ກອງປະຊຸມຄົບຄະນະຄັ້ງທີສອງຂອງຄະນະກວດກາສູນກາງພັກກອມມູນິດຈີນສະໄໝທີ 19 ຂອງພັກກອມມູນິດຈີນອັດລົງຢູ່ນະຄອນຫຼວງປັກກິ່ງ ສປ ຈີນໃນວັນທີ 13 ມັງກອນນີ້. ສະພາບການໃໝ່ຕ້ານການສໍ້ລາດບັງຫຼວງຂອງພັກກອມມູນິດຈີນໄດ້ສ້າງຄວາມສົນໃຈຢ່າງສູງຕໍ່ທົ່ວໂລກ.
ຄະນະກວດກາສູນກາງພັກກອມມູນິດຈີນແຈ້ງຂ່າວໃນວັນທີ 11 ມັງກອນນີ້ວ່າ, ອົງການ ກວດກາທົ່ວປະເທດຈີນໄດ້ລົງໂທດ 5 ແສນ 2 ໝື່ນ 7 ພັນຄົນໃນປີຜ່ານມາ, ໃນນັ້ນລວມທັງເຈົ້າໜ້າທີ່ລະດັບແຂວງຂຶ້ນໄປມີ 58 ຄົນ.
ທ່ານດີມີຕຣີ ວຣາຊິສ, ຜູ້ຮັບຜິດຊອບວຽກງານຕ້ານການສໍ້ລາດບັງຫຼວງແລະອາຊະຍະກຳເສດຖະກິດຂອງຫ້ອງການບັນຫາອາຊະຍະກຳແລະຢາເສບຕິດຂອງອົງການສະຫະປະຊາຊາດກ່າວວ່າ, ຄະດີກ່ຽວພັນເຖິງການສໍ້ລາດບັງຫຼວງທີ່ຈີນສຳຫຼວດສືບສວນໃນຫຼາຍປີຜ່ານມາສະແດງໃຫ້ເຫັນວ່າຈີນໄດ້ທຳຄວາມພະຍາຍາມຢ່າງໃຫຍ່ຫຼວງໃນຂົງເຂດຕ້ານການສໍ້ລາດບັງຫຼວງແລະໄດ້ຮັບຜົນງານຢ່າງຫຼວງຫຼາຍ.
ໃນກອງປະຊຸມສຸດຍອດຈີນ-ອາຊຽນທີ່ຈັດຂຶ້ນຢູ່ຟີລິບປີນໃນເດືອນພະຈິກປີຜ່ານມາ, ໄດ້ອອກ "ຖະແຫຼງການຮ່ວມລະຫວ່າງຈີນ-ອາຊຽນກ່ຽວກັບການເພີ່ມທະວີຕ້ານການສໍ້ລາດບັງຫຼວງ", ນີ້ໝາຍຄວາມວ່າຜູ້ທີ່ສໍ້ລາດບັງຫຼວງບໍ່ສາມາດໜີໄປລີ້ໄພບໍ່ສາມາດໂອນຊັບສິນຂອງຕົນໄປອາຊຽນໄດ້ຢ່າງເດັດຂາດ.
ທ່ານລຸຊິໂອ ພິດໂລ, ຜູ້ຊ່ຽວຊັນບັນຫາຈີນຂອງມະຫາວິທະຍາໄລ Ateneo de Manila ກ່າວວ່າ, ຈີນປະຕິບັດການຕິດຕາມຈັບຜູ້ສໍ້ລາດບັງຫຼວງທີ່ໜີໄປຢູ່ຕ່າງປະເທດຢ່າງສຳເລັດຜົນ, ໄດ້ສະແດງໃຫ້ເຫັນຄວາມຕັດສິນໃຈຂອງຈີນທີ່ຕ້ານການສໍ້ລາດບັງຫຼວງຕາມກົດໝາຍຢ່າງເຂັ້ມງວດ.