ທ່ານຈ່າງຈ້ຽນໂກວ໋ ຮອງລັດຖະມົນຕີກະຊວງຊັບພະຍາກອນມະນຸດແລະປະກັນສັງຄົມ, ຫົວໜ້າອົງການຜູ້ຊ່ຽວຊານຊາວຕ່າງປະເທດແຫ່ງຊາດຈີນ ກ່າວໃນກອງປະຊຸມວຽກງານດຶງດູດຜູ້ມີຄວາມຮູ້ຄວາມສາມາດສະຕິປັນຍາຈາກພາຍນອກທົ່ວປະເທດ ທີ່ຈັດຂຶ້ນຢູ່ປັກກິ່ງໃນວັນທີ 16 ມັງກອນນີ້ວ່າ: ປັດຈຸບັນ, ຈີນຕ້ອງການຜູ້ມີຄວາມຮູ້ຄວາມສາມາດດ່ວນກວ່າຍາມໃດໝົດໃນປະຫວັດສາດ ແລະໃນຕໍ່ໜ້າຈະພະຍາຍາມດຶງດູດຜູ້ມີຄວາມຮູ້ຄວາມສາມາດລະດັບສູງຈາກພາຍນອກ ໂດຍເນັ້ນ "ລະດັບສູງ, ຫົວກະທິ, ເດັ່ນ ແລະ ພາຍໃນປະເທດຂາດເຂີນ" ແລະໃຫ້ຜູ້ມີຄວາມຮູ້ຄວາມສາມາດຊາວຕ່າງປະເທດຮູ້ສຶກໄດ້ຮັບຜົນປະໂຫຍດຫຼາຍຍິ່ງຂຶ້ນໃນການມາປະດິດສ້າງ ແລະ ພັດທະນາຢູ່ຈີນ.
ຕົວເລກຫຼ້າສຸດສະແດງໃຫ້ເຫັນວ່າ: ຊາວຕ່າງປະເທດທີ່ມາເຮັດວຽກຢູ່ແຜ່ນດິນໃຫຍ່ຈີນໃນປີ 2016 ບັນລຸເຖິງ 908.000 ເທື່ອຄົນ. ທ່ານຈ່າງຈ້ຽນໂກວ໋ ກ່າວຕື່ມວ່າ: ໃນ 5 ປີຜ່ານມາ, ຈີນ ພະຍາຍາມດຶງດູດຜູ້ມີຄວາມຮູ້ຄວາມສາມາດລະດັບສູງຈາກພາຍນອກ ໂດຍຍຶດໝັ້ນເນັ້ນ "ລະດັບສູງ, ຫົວກະທິ, ເດັ່ນ ແລະ ພາຍໃນປະເທດຂາດເຂີນ" ໄດ້ຊຸກຍູ້ໃຫ້ບັນດາຂົງເຂດ, ບັນດາຂະແໜງການມີສ່ວນຮ່ວມໃນຕ່ອງໂສ້ອຸດສາຫະກຳ, ຕ່ອງໂສ້ມູນຄ່າ ແລະ ຕ່ອງໂສ້ການປະດິດສ້າງ ໃນທົ່ວໂລກ ເຊິ່ງໄດ້ສະໜອງຜູ້ມີຄວາມຮູ້ຄວາມສາມາດໃຫ້ແກ່ການພັດທະນາເສດຖະກິດ-ສັງຄົມ.
ຂ່າວລາຍງານຕື່ມວ່າ: ມາຮອດປັດຈຸບັນ, ມີຜູ້ຊ່ຽວຊານຕ່າງປະເທດຈາກ 70 ກວ່າປະເທດແລະເຂດແຄວ້ນ 1.549 ຄົນໄດ້ຮັບລາງວັນມິດຕະພາບຈາກລັດຖະບານຈີນ.