ວັນທີ 16 ມັງກອນນີ້, ໃນກອງປະຊຸມຂ່າວ, ທ່ານລູ້ຄ່າງ ໂຄສົກກະຊວງການຕ່າງປະເທດຈີນກ່າວວ່າ, ໃນເວລາລົມໂທລະສັບ, ທ່ານສີຈິ້ນຜິງ ປະທານປະເທດຈີນໄດ້ແລກປ່ຽນຄວາມເຫັນກ່ຽວກັບການພົວພັນລະຫວ່າງສອງຝ່າຍ ແລະສະຖານະການແຫຼມເກົາຫຼີກັບທ່ານໂດນານ ທຣຳ ປະທານາທິບໍດີອາເມລິກາ. ສອງຝ່າຍໄດ້ປຶກສາຫາລືວ່າຈະເຮັດແນວໃດເພື່ອນຳໃຊ້ 4 ກົນໄກສົນທະນາລະດັບສູງໃຫ້ດີ ເພື່ອຊຸກຍູ້ການແລກປ່ຽນຮ່ວມມືໃນຂົງເຂດຕ່າງໆ, ເຊັ່ນ: ການທະຫານ, ການປາບປາມຢາເສບຕິດ, ກົດໝາຍ, ເສດຖະກິດການຄ້າ, ວັດທະນະທຳ, ທ້ອງຖິ່ນແລະອື່ນໆ, ຊຸກຍູ້ການພົວພັນແລະການຮ່ວມມືລະຫວ່າງຈີນອາເມລິກາໃຫ້ພັດທະນາກ້າວໜ້າຕື່ມອີກ.
ທ່ານລູ້ຄ່າງກ່າວວ່າ, ທ່ານປະທານສີຈິ້ນຜິງຊີ້ອອກຢ່າງຈະແຈ້ງວ່າ, ການພົວພັນທາງດ້ານເສດຖະກິດການຄ້າລະຫວ່າງສອງປະເທດຈີນອາເມລິກາໄດ້ນຳເອົາຜົນປະໂຫຍດຕົວຈິງໃຫ້ແກ່ປະຊາຊົນສອງປະເທດ. ຍອດຈຳນວນການຮ່ວມມືທາງດ້ານເສດຖະກິດການຄ້າລະຫວ່າງສອງປະເທດຈີນອາເມລິກາໃຫຍ່ຫຼາຍ, ສະນັ້ນ, ການພົວພັນດ້ານເສດຖະກິດການຄ້າລະຫວ່າງສອງປະເທດປາກົດມີຄວາມຂັດແຍ້ງກັນຈຳນວນໜຶ່ງກໍ່ແມ່ນເລື່ອງທີ່ຫຼີກເວັ້ນບໍ່ໄດ້. ສຳຄັນແມ່ນ ສອງຝ່າຍຄວນໃຊ້ວິທີທີ່ມີລັກສະນະສ້າງສັນ, ເພີ່ມທະວີຜົນປະໂຫຍດຮ່ວມກັນລະຫວ່າງສອງຝ່າຍ, ແລະຕ້ອງແກ້ໄຂບັນຫາດ້ານເສດຖະກິດການຄ້າຈຳນວນໜຶ່ງທີ່ສອງຝ່າຍສົນໃຈຮ່ວມກັນໃຫ້ເໝາະສົມ.
ທ່ານລູ້ຄ່າງກ່າວວ່າ, ປາມຸກລັດສອງປະເທດຍັງໄດ້ແລກປ່ຽນຄວາມເຫັນກ່ຽວກັບບັນຫາແຫຼມເກົາຫຼີໃນເວລາລົມໂທລະສັບ.