ຕາມຂ່າວ CRI: ວັນທີ 15 ມັງກອນນີ້ໃນໂອກາດໃຫ້ສຳພາດຕໍ່ນັກຂ່າວ CRI, ທ່ານຫວງຊີລຽນ, ວ່າທີ່ເອກອັກຄະລັດຖະທູດຈີນປະຈຳອາຊຽນກ່າວວ່າ, ຕົນຮູ້ສຶກມີຄວາມຮັບຜິດຊອບຢ່າງໃຫຍ່ຫຼວງແລະມີພາລະກຳສູງສົ່ງ. ຈີນແລະອາຊຽນໄດ້ກ້າວເຂົ້າສູ່ໄລຍະພັດທະນາໃໝ່, ຫວັງວ່າໃນໄລຍະດຳລົງຕຳແໜ່ງຂອງຕົນຈະສາມາດຊຸກຍູ້ສາຍພົວພັນລະຫວ່າງຈີນ-ອາຊຽນໃຫ້ຂະຫຍາຍຕົວຢ່າງແທ້ຈິງ, ແລະສ້າງປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ.
ທ່ານຫວງຊີລຽນກ່າວວ່າ, ອາຊຽນແມ່ນອົງການຮ່ວມມືພາກພື້ນສຳຄັນທີ່ສຸດໃນເຂດອາຊີຕາເວັນອອກສຽງໃຕ້. ປັດຈຸບັນຈີນແລະອາຊຽນລ້ວນແຕ່ໄດ້ກ້າວເຂົ້າສູ່ຍຸກໃໝ່. ສຳລັບອາຊຽນແລ້ວ, ປະຊາຄົມອາຊຽນໄດ້ສ້າງສຳເລັດແລ້ວ, ການກໍ່ສ້າງປະຊາຄົມດ້ານຄວາມໝັ້ນຄົງການເມືອງ, ເສດຖະກິດແລະສັງຄົມກໍໄດ້ຮັບຄວາມຄືບໜ້າສຳຄັນ. ປີ 2017 ເປັນປີທີ່ອາຊຽນສ້າງຕັ້ງຂຶ້ນຄົບຮອບ 50 ປີ, ແລະປີນີ້ແມ່ນປີທຳອິດຂອງ 50 ປີຮອບໃໝ່ຂອງອາຊຽນ, ປະເທດອາຊຽນໄດ້ຜະເຊີນກັບໂອກາດພັດທະນາໃໝ່. ພ້ອມກັນນັ້ນຈີນກໍໄດ້ກ້າວເຂົ້າສູ່ການກໍ່ສ້າງສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່, ອາຊຽນແມ່ນຄູ່ຮ່ວມມືສຳຄັນຂອງຈີນແຫ່ງການສ້າງປະຊາຄົມຮ່ວມຊາຕາກຳມວນມະນຸດແລະສ້າງສາຍພົວພັນແບບໃໝ່. ທ່ານຫວງຊີລຽນກ່າວຕື່ມວ່າ, ຫວັງວ່າພາຍຫຼັງດຳລົງຕຳແໜ່ງຢ່າງເປັນທາງການແລ້ວ, ຕົນຈະສາມາດຮ່ວມກັບເພື່ອນມິດອາຊຽນ, ລົງເລິກການຮ່ວມມືລະຫວ່າງຈີນກັບອາຊຽນ, ເພີ່ມຄວາມໄວ້ເນື້ອເຊື່ອໃຈທາງການເມືອງ, ຊຸກຍູ້ມິດຕະພາບລະຫວ່າງປະຊາຊົນຂອງປະເທດຕ່າງໆ, ຊຸກຍູ້ໃຫ້ສາຍພົວພັນລະຫວ່າງຈີນ-ອາຊຽນຍົກລະດັບສູງຂຶ້ນຕື່ມ, ແລະສ້າງປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນກວ່າເກົ່າ.
ທ່ານຫວງຊີລຽນໄດ້ກ່າວເຖິງວຽກງານທີ່ສຳຄັນສາມດ້ານທີ່ຈະຕ້ອງປະຕິບັດຄື: ໜຶ່ງ, ປີນີ້ແມ່ນປີທີ່ຈີນ-ອາຊຽນສ້າງສາຍພົວພັນຄູ່ຮ່ວມຍຸດທະສາດຄົບຮອບ 15 ປີ, ຫວັງວ່າຈະນຳໃຊ້ໂອກາດດັ່ງກ່າວສະຫຼຸບບົດຮຽນທີ່ໄດ້ຮບຜົນສຳເລັດໃນ 15 ປີຜ່ານມາ, ຊຸກຍູ້ໃຫ້ການພົວພັນລະຫວ່າງຈີນ-ອາຊຽນກ້າວຂຶ້ນສູ່ລະດັບໃໝ່. ສອງ, ຊຸກຍູ້ສ້າງວິໄສທັດປີ 2030 ຂອງສາຍພົວພັນຄູ່ຮ່ວມຍຸດທະສາດລະຫວ່າງຈີນ-ອາຊຽນ, ວິໄສທັດດັ່ງກ່າວຈະສ່ອງແສງເຖິງຄວາມປາຖະໜາຮ່ວມຂອງປະຊາຊົນຈີນແລະອາຊຽນ, ນຳພາປະຊາຊົນຂອງ 11 ປະເທດກ້າວໄປສູ່ວິໄສທັດຮ່ວມກັນ. ແລະສາມ, ຜູ້ນຳຈີນແລະອາຊຽນໄດ້ຮ່ວມກັນຕົກລົງເອົາປີ 2018 ເປັນປີປະດິດສ້າງໃໝ່ຈີນ-ອາຊຽນ, ຈີນພວມປະຕິບັດຍຸທະສາດພັດທະນາດ້ວຍການປະດິດສ້າງໃໝ່, ອາຊຽນກໍມີຍຸດທະສາດທີ່ຄ້າຍຄືກັນ. ຫວັງວ່າຜ່ານການຈັດກິດຈະກຳຕ່າງໆໃນປີປະດິດສ້າງໃໝ່ຈີນ-ອາຊຽນ, ຈີນແລະອາຊຽນຈະສາມາດເຊື່ອມຈອດທ່າແຮງຂອງຕົນ, ແລະບັນລຸການພັດທະນາຮ່ວມກັນ.