ວັນທີ 17 ມັງກອນນີ້ໃນສັນຍາຮອບດ້ານກ່ຽວກັບບັນຫານິວເຄຼຍອີຣານໄດ້ປະຕິບັດຄົບຮອບ 2 ປີແລ້ວ, ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫຼງການໂດຍຜ່ານໂຄສົກຂອງຕົນ, ຮຽກຮ້ອງໃຫ້ຮັກສາສັນຍານິວເຄຼຍອີຣານ.
ຖະແຫຼງການລະບຸວ່າ, ທ່ານກູເຕີເຣັສ ເຊື່ອວ່າສັນຍານິວເຄຼຍອີຣານແມ່ນຊ່ອງທາງດີທີ່ສຸດທີ່ຮັບປະກັນໃຫ້ແຜນການນິວເຄຼຍອີຣານເພື່ອນຳໃຊ້ໃນເປົ້າໝາຍສັນຕິພາບເທົ່ານັ້ນ, ແມ່ນຜົນງານສຳຄັນໃນຂົງເຂດບໍ່ແຜ່ລະບາດອາວຸດນິວເຄຼຍແລະຂົງເຂດການຕ່າງປະເທດ, ໄດ້ປະກອບສ່ວນເຂົ້າໃນສັນຕິພາບແລະສະຖຽນລະພາບຂອງພາກພື້ນແລະສາກົນ. ທ່ານ ກູເຕີເຣັສ ເຫັນວ່າ, ອົງການພະລັງງານປະລະມານູສາກົນໄດ້ຢືນຢັນຫຼາຍເທື່ອແລ້ວວ່າອີຣານໄດ້ປະຕິບັດຕາມຄຳສັນຍາທີ່ຂ້ອງກ່ຽວກັບນິວເຄຼຍທີ່ກຳນົດໄວ້ໃນສັນຍາດັ່ງກ່າວ.
ຖະແຫຼງການລະບຸອີກວ່າ, ທ່ານກູເຕີເຣັສ ຮຽກຮ້ອງແກ້ໄຂຄວາມເປັນຫ່ວງກ່ຽວກັບອີຣານປະຕິບັດສັນຍານິວເຄຼຍຮອບດ້ານໂດຍອີງຕາມກົນໄກທີ່ໄດ້ກຳນົດໄວ້ໃນສັນຍາດັ່ງກ່າວ. ຄວນແກ້ໄຂບັນຫາທີ່ບໍ່ກ່ຽວພັນເຖິງສັນຍາດັ່ງກ່າວໂດຍກົງໂດຍບໍ່ເຂົ້າຂ້າງຝ່າຍໃດຝ່າຍໜຶ່ງ, ເພື່ອຮັກສາສັນຍາແລະໝາກຜົນຂອງສັນຍາດັ່ງກ່າວ.
ວັນທີ 12 ມັງກອນນີ້, ທ່ານໂດນັນ ທຣຳ ປະທານາທິບໍດີອາເມລິກາປະກາດວ່າຈະແກ່ຍາວໄລຍະຍົກເວັ້ນການຂວ້ຳບາດຕໍ່ບັນຫານິວເຄຼຍອີຣານເປັນຄັ້ງສຸດທ້າຍ, ແລະຮຽກຮ້ອງໃຫ້ດັດແກ້ສັນຍາດັ່ງກ່າວ, ເພື່ອເພີ່ມເນື້ອໃນກ່ຽວກັບການຈຳກັດໂຄງການຂີປະນາວຸດຂອງອີຣານແລະອື່ນໆ.
 |
