ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດເຕືອນໃນວັນທີ 18 ມັງກອນນີ້ວ່າ: ອາວຸດທີ່ມີແສນຍານຸພາບລ້າງຜານສູງ ເປັນໄພຂົ່ມຂູ່ຕໍ່ສັນຕິພາບແລະສະຖຽນລະພາບຂອງໂລກນັບມື້ນັບຮ້າຍແຮງຂຶ້ນ.
ວັນທີ 18 ມັງກອນນີ້, ສະພາຄວາມໝັ້ນຄົງອົງການສະຫະປະຊາຊາດ ໄດ້ຈັດກອງປະຊຸມອະພິປາຍຂັ້ນສູງກ່ຽວກັບການຈຳກັດອາວຸດແສນຍານຸພາບລ້າງຜານສູງ ແລະ ມາດຕະການສ້າງຄວາມໄວ້ເນື້ອເຊື່ອໃຈກັນ ແລະ ທ່ານກູເຕີເຣັສ ເລຂາທິການໃຫຍ່ອົງການສະຫະປະຊາຊາດໄດ້ກ່າວປາໄສວ່າ: ທົ່ວໂລກມີຄວາມເປັນຫ່ວງຕໍ່ອາວຸດນິວເຄລຍຂຶ້ນຮອດລະດັບສູງສຸດນັບແຕ່ສົງຄາມເຢັນສິ້ນສຸດລົງເປັນຕົ້ນມາ; ອາເມລິກາແລະຣັດເຊຍມີຄວາມເຊື່ອໃຈກັນຫຼຸດລົງເລື້ອຍໆໃນບັນຫາອາວຸດນິວເຄລຍ ແລະອື່ນໆ; ສັນຍາຮອບດ້ານກ່ຽວກັບບັນຫານິວເຄລຍອີຣານ ພວມຜະເຊີນກັບຄວາມລະແວງສົງໄສ; ການນຳໃຊ້ອາວຸດເຄມີໃນແດນຊີຣີໄດ້ເປັນການທ້າທາຍຢ່າງໜັກໜ່ວງຕໍ່ລະບົບການເກືອດຫ້າມອາວຸດເຄມີທົ່ວໂລກ. ຂະນະທີ່ສະຖານະການຢູ່ແຫຼມເກົາຫຼີ ໄດ້ເປັນສິ່ງທ້າທາຍທີ່ເຄັ່ງຕຶງ ແລະ ຂ້ຽວຂາດທີ່ສຸດ ຕໍ່ສັນຕິພາບແລະສະຖຽນລະພາບຂອງໂລກ. ດ້ວຍເຫດນີ້, ຕົນຈຶ່ງມີຄວາມເປັນຫ່ວງຢ່າງຍິ່ງຕໍ່ຄວາມສ່ຽງທີ່ອາດຈະເກີດການປະທະກັນດ້ວຍການທະຫານນັບມື້ສູງຂຶ້ນແລະຜົນຮ້າຍຢ້ອນຫຼັງອາດຈະຕາມມາເໜືອຄວາມຄາດຝັນ.