ກອງປະຊຸມຄົບຄະນະເທື່ອທີສອງຂອງຄະນະກຳມະການສູນກາງພັກກອມມູນິດຈີນຊຸດທີ 19 ໄດ້ຈັດຂຶ້ນຢູ່ນະຄອນຫຼວງປັກກິ່ງແຕ່ວັນທີ 18 ຫາວັນທີ 19 ມັງກອນນີ້ ເຊິ່ງໄດ້ຮັບຮອງ "ຂໍ້ສະເໜີຂອງສູນກາງພັກກອມມູນິດຈີນກ່ຽວກັບການດັດແກ້ເນື້ອໃນບາງຕອນຂອງລັດຖະທຳມະນູນ".
ກອງປະຊຸມດັ່ງກ່າວໄດ້ເນັ້ນວ່າ: ສັງຄົມນິຍົມທີ່ມີສີສັນພິເສດຂອງຈີນເຂົ້າສູ່ຍຸກສະໄໝໃໝ່, ນີ້ແມ່ນທີ່ຕັ້ງປະຫວັດສາດການພັດທະນາໃໝ່ຂອງຈີນ. ຕາມສະພາບໃໝ່ ແລະໜ້າທີ່ໃໝ່ໃນການຍຶດໝັ້ນ ແລະພັດທະນາສັງຄົມນິຍົມທີ່ມີສີສັນພິເສດຂອງຈີນໃນຍຸກສະໄໝໃໝ່ມີຄວາມຈຳເປັນຕ້ອງດັດແປງລັດຖະທຳມະນູນໂດຍຈັດເອົາຜົນສຳເລັດການປະດິດສ້າງໃໝ່ອັນໃຫຍ່ຫຼວງທາງດ້ານທິດສະດີ, ພຶດຕິກຳ ແລະລະບອບທີ່ໄດ້ຮັບໃນການປະຕິບັດຕົວຈິງຂອງພັກ ແລະປະຊາຊົນນັ້ນເຂົ້າໃນລັດຖະທຳມະນູນ ເພື່ອຍົກລະດັບໃຫ້ເປັນຂໍ້ກຳນົດໃນລັດຖະທຳມະນູນ.
ກອງປະຊຸມດັ່ງກ່າວເຫັນວ່າ, ການທີ່ນຳເອົາທິດສະດີ ແລະທິດທາງນະໂຍບາຍທີ່ສຳຄັນທີ່ກຳນົດໃນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນ ໂດຍສະເພາະແມ່ນແນວຄິດຂອງທ່ານສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກສະໄໝໃໝ່ບັນທຶກເຂົ້າໃນກົດໝາຍພື້ນຖານແຫ່ງຊາດນັ້ນກໍ່ເພື່ອສະແດງໃຫ້ເຫັນເຖິງໝາກຜົນໃໝ່, ປະສົບການໃໝ່ ແລະຄວາມຮຽກຮ້ອງຕ້ອງການໃໝ່ໃນການພັດທະນາພາລະກິດພັກ-ລັດ, ຊຸກຍູ້ໃຫ້ລັດຖະທຳມະນູນກ້າວເດີນໄປພ້ອມຍຸກສະໄໝ ແລະປັບປຸງໃຫ້ດີຂຶ້ນບົນພື້ນຖານການຮັກສາລັກສະນະຕໍ່ເນື່ອງ, ຄວາມໝັ້ນທ່ຽງ ແລະອິດທິພົນຂອງລັດຖະທຳມະນູນໂດຍລວມ, ຈະໃຫ້ການຮັບປະກັນດ້ານລັດຖະທຳມະນູນຢ່າງແຂງແຮງໃຫ້ແກ່ການຍຶດໝັ້ນ ແລະພັດທະນາສັງຄົມນິຍົມທີ່ມີສີສັນພິເສດຂອງຈີນ, ບັນລຸເປົ້າໝາຍການສູ້ຊົນໃນວັນຄົບຮອບ 100 ປີແຫ່ງການສ້າງຕັ້ງສປ ຈີນ ແລະສ້າງຕັ້ງພັກກອມມູນິດຈີນ ແລະເຮັດໃຫ້ຄວາມໄຝ່ຝັນແຫ່ງການຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນຄືນໃໝ່ໃນຍຸກໃໝ່.
ພາຍຫຼັງລັດຖະທຳມະນູນຂອງຈີນຖືກເຜີຍແຜ່ ແລະມີຜົນບັງຄັບໃຊ້ໃນປີ 1982 ເປັນຕົ້ນມາ, ໄດ້ດັດແປງ 4 ເທື່ອ ຄື ໃນປີ 1988, 1993, 1999 ແລະ 2004.
