ສຳນັກຂ່າວສານທາງການມາຣົກລາຍງານໃນວັນທີ 20 ມັງກອນນີ້ວ່າ: ທ່ານ ໂດນັນ ທຣຳ ປະທານາທິບໍດີອາເມລິກາໄດ້ຢືນຢັນໃນຈົດໝາຍຕອບ ເຈົ້າຊີວິດທີ Ⅵ ໂມຮຳເມັດ ປະເທດມາຣົກວ່າ: ບັນຫາອະທິປະໄຕຂອງເຢລູຊາເລັມຈະໄດ້ຮັບການຕັດສິນໂດຍຜ່ານການເຈລະຈາ,ອາເມລິກາຈະບໍ່ຍຶດຖືຫຼັກໝັ້ນຕໍ່ອະທິປະໄຕແລະຊາຍແດນຂອງເຢລູຊາເລັມ.
ທ່ານ ໂດນັນ ທຣຳ ກ່າວວ່າ: ທ່ານຈະພະຍາຍາມສຸດຂີດເພື່ອຊຸກຍູ້ການເຊັນສັນຍາສັນຕິພາບຖາວອນລະຫວ່າງອິສຣາແອນ-ປາແລັສຕິນ. ຖ້າຝ່າຍທີ່ກ່ຽວຂ້ອງໄດ້ບັນລຸຄວາມເປັນເອກະພາບກັນ ທ່ານຈະສະໜັບສະໜູນແຜນການສອງປະເທດ.
ໃນເດືອນທັນວາປີ 2017, ທ່ານ ໂດນັນ ທຣຳ ໄດ້ປະກາດຮັບຮອງເຢລູຊາເລັມເປັນນະຄອນຫຼວງອິສຣາແອນ,ແລະກ່າວວ່າຈະເລີ່ມດຳເນີນຂະບວນການຍ້າຍສະຖານທູດອາເມລິກາປະຈຳອິສຣາແອນຈາກເມືອງແຕນ ອາວິຟ໌ໄປເມືອງເຢລູຊາເລັມ. ປະຊາຄົມໂລກໄດ້ສະແດງຄວາມຄັດຄ້ານຕໍ່ເລື່ອງນີ້. ເຈົ້າຊີວິດ ໂມຮຳເມັດທີ Ⅵໄດ້ສົ່ງຈົດໝາຍໄປຍັງທ່ານ ໂດນັນ ທຣຳ ເພື່ອສະແດງຄວາມເປັນຫ່ວງຢ່າງໜັກໜ່ວງຕໍ່ເລື່ອງນີ້,ພ້ອມທັງປະຕິເສດຕໍ່ການຕົກລົງໃດໆທີ່ຈະປ່ຽນສະພາບການໃນປັດຈຸບັນຂອງເຢລູຊາເລັມ.