ທ່ານໄມ ເປນສ໌ ຮອງປະທານາທິບໍດີອາເມລິກາທີ່ພວມຢ້ຽມຢາມອິສຣາແອນ ກ່າວໃນວັນທີ 22 ມັງກອນນີ້ວ່າ: ຈະເລີ່ມດຳເນີນແຜນການຍ້າຍສະຖານທູດອາເມລິກາປະຈຳອິສຣາແອນ ຈາກແຕນອາວິບ ໄປຢູ່ເຢຣູຊາແລມ ຢ່າງເປັນທາງການພາຍໃນບໍ່ເທົ່າໃດອາທິດ ແລະ ສະຖານທູດແຫ່ງໃໝ່ຈະເລີ່ມປະຕິບັດວຽກງານຕໍ່ພາຍນອກກ່ອນທ້າຍປີ 2019.
ທ່ານເປນສ໌ ໄດ້ກ່າວແຜນການນີ້ໃນຂະນະກ່າວປາໄສຢູ່ລັດຖະສະພາອິສຣາແອນໃນວັນດັ່ງກ່າວ ແລະ ຄຳປາໄສຂອງທ່ານກໍຖືກສະມາຊິກສະພາສັງກັດພັກການເມືອງອາຣັບປະທ້ວງ. ທ່ານເປນສ໌ ໄດ້ເດີນທາງເຖິງແຕນອາວິບໃນຕອນຄ່ຳວັນທີ 21 ມັງກອນນີ້ ແລະ ຢ້ຽມຢາມອິສຣາແອນເປັນເວລາ 2 ວັນ.