ທ່ານວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມລະດັບລັດຖະມົນຕີຄັ້ງທີ 2 ຂອງກອງປະຊຸມເວທີປຶກສາຫາລືຈີນ-ອາເມລິກາລາຕິນ ທີ່ຈັດຂຶ້ນຢູ່ນະຄອນຫຼວງຊັງຕີອາໂກປະເທດຈີເລໃນວັນທີ 22 ມັງກອນນີ້.
ທ່ານວາງຢີ້ກ່າວປາໄສໃນພິທີໄຂກອງປະຊຸມວ່າ, 3 ປີມານີ້, ພາຍໃຕ້ຄວາມພະຍາຍາມຮ່ວມຂອງຈີນ ແລະ ບັນດາປະເທດໃນອາເມລິກາລາຕິນ, ກອງປະຊຸມເວທີປຶກສາຫາລືໄດ້ຂະຫຍາຍຕົວເປັນຢ່າງດີ, ຄວາມໄວ້ເນື້ອເຊື່ອໃຈກັນທາງການເມືອງລະຫວ່າງສອງຝ່າຍໄດ້ຂະຫຍາຍສູ່ລວງເລິກ, ການຮ່ວມມືທາງເສດຖະກິດການຄ້າໄດ້ເຕີບໂຕຢ່າງຕໍ່ເນື່ອງ ແລະ ການແລກປ່ຽນດ້ານວັດທະນະທຳມີຫຼາກຫຼາຍສີສັນ.
ທ່ານວາງຢີ້ກ່າວເນັ້ນວ່າ, ກອງປະຊຸມເວທີປຶກສາຫາລືຈີນ-ອາເມລິກາລາຕິນໄດ້ປະສົບຜົນສຳເລັດທີ່ອຸດົມສົມບູນ ເນື່ອງຈາກສອງຝ່າຍໄດ້ເຄົາລົບເຊິ່ງກັນ ແລະ ກັນ ແລະ ສະເໝີພາບກັນໂດຍຕະຫຼອດ ແລະ ຍຶດໝັ້ນສະແຫວງຫາການຮ່ວມມືກັນ ແລະ ຊຸກຍູ້ການພັດທະນາຮ່ວມກັນ. ໃນໄລຍະຕໍ່ໄປ, ຈີນຍິນດີຮ່ວມກັບບັນດາປະເທດໃນອາເມລິກາລາຕິນ ໂດຍອີງຕາມເປົ້າໝາຍຄູ່ຮ່ວມມືຮອບດ້ານທີ່ທ່ານປະທານສີຈິ້ນຜິງ ແລະ ບັນດາຜູ້ນຳປະເທດອາເມລິກາລາຕິນກຳນົດໄວ້, ຖືເອົາການຮ່ວມກັນສ້າງ "ໜຶ່ງແລວທາງໜຶ່ງເສັ້ນທາງ" ເປັນໂອກາດໃໝ່, ລົງເລິກຂອບການຮ່ວມມື "1+3+6" ແລະ ຊຸກຍູ້ໃຫ້ການຮ່ວມມືລະຫວ່າງສອງຝ່າຍກ້າວຂຶ້ນສູ່ລະດັບໃໝ່ ແລະ ເຮັດໃຫ້ການພັດທະນາມີສີສັນໃໝ່.
