ກະຊວງການຕ່າງປະເທດປາກິສະຖານໄດ້ອອກຖະແຫຼງການໃນວັນທີ 24 ມັງກອນນີ້ ໂດຍກ່າວປະນາມ "ຄະນະຈັດສົ່ງພິເສດສະໜັບສະໜູນຢ່າງເດັດດ່ຽວ" ທີ່ນຳພາໂດຍອາເມລິກາ ໄດ້ໃຊ້ຍົນບໍ່ມີຄົນຂັບກໍ່ການໂຈມຕີທາງອາກາດຢູ່ເຂດກູຣາມ ທາງພາກຕາເວັນຕົກສຽງເໜືອປະເທດຕົນ ແລະກ່າວວ່າການເຄື່ອນໄຫວຂອງອາເມລິກາຈະກະທົບເຖິງການຮ່ວມມືຕ້ານການກໍ່ການຮ້າຍລະຫວ່າງສອງປະເທດ.
ກະຊວງການຕ່າງປະເທດປາກິສະຖານ ໄດ້ອອກຖະແຫຼງການຢູ່ເວັບໄຊທາງການຂອງຕົນໃນຕອນບ່າຍວັນດັ່ງກ່າວວ່າ: ການເຄື່ອນໄຫວແຕ່ຝ່າຍດຽວຄືດັ່ງກ່າວຂອງອາເມລິກາ ຈະເປັນການທຳລາຍຈິດໃຈການຮ່ວມມືຕ້ານການກໍ່ການຮ້າຍລະຫວ່າງປາກິສະຖານ-ອາເມລິກາ. ປາກິສະຖານໄດ້ເນັ້ນຄວາມສຳຄັນຂອງການແລກປ່ຽນຂ່າວລັບຕ້ານການກໍ່ການຮ້າຍຕໍ່ອາເມລິກາມາໂດຍຕະຫຼອດ ເພື່ອສ້າງຄວາມສະດວກໃຫ້ແກ່ປາກິສະຖານໃຊ້ການເຄື່ອນໄຫວທີ່ເໝາະສົມຕໍ່ກຸ່ມກໍ່ການຮ້າຍໃນດິນແດນປະເທດຕົນໂດຍອາໄສກຳລັງປະກອບອາວຸດຂອງຕົນ. ຖະແຫຼງການຍັງລະບຸວ່າ: ປາກິສະຖານໄດ້ເນັ້ນຫຼາຍເທື່ອແລ້ວວ່າຈະສົ່ງຄືນຊາວອົບພະຍົບລີ້ໄພຂອງອັຟການິສະຖານໃນປະເທດຕົນ ເພື່ອປ້ອງກັນພວກກໍ່ການຮ້າຍທີ່ແຝງຕົວຢູ່ກັບຊາວອົບພະຍົບເຫຼົ່ານີ້.
