ຕາມຂ່າວCRI: ທ່ານອາເລດິນ ໂບຣູເຈີດີ ປະທານຄະນະກຳມາທິການນະໂຍບາຍທາງການຕ່າງປະເທດ ແລະຄວາມໝັ້ນຄົງແຫ່ງຊາດຂອງສະພາອິດສະລາມອີຣານເນັ້ນວ່າ: ປະເທດຕົນຈະບໍ່ດຳເນີນການເຈລະຈາກ່ຽວກັບແຜນການຂີປະນາວຸດກັບປະເທດໃດໆ.
ທ່ານອະລະດິນ ໂບຣູເຈີດີເນັ້ນຕື່ມວ່າ: ປະເທດຕົນຄັດຄ້ານການນຳໃຊ້ອາວຸດທີ່ມີແສນຍານຸພາບລ້າງຜານສູງ ໂດຍສະເພາະອາວຸດນິວເຄຼຍຢ່າງເດັດດ່ຽວ. ສະນັ້ນ, ຊ່ອງທາງປ້ອງກັນການຮຸກຮານຂອງສັດຕູພຽງທາງດຽວກໍຄືເພີ່ມທະວີຄວາມສາມາດດ້ານຂີປະນາວຸດຂອງຕົນ ເຊິ່ງເປັນນະໂຍບາຍທີ່ບໍ່ສາມາດເຈລະຈາກັບປະເທດໃດໆໄດ້.
ທ່ານກ່າວຕໍ່ໄປວ່າ: ພາຍຫຼັງທ່ານໂດນັນ ທຣຳ ປະທານາທິບໍດີອາເມລິກາດຳລົງຕຳແໜ່ງແລ້ວ ໄດ້ຂົ່ມຂູ່ຫຼາຍເທື່ອແລ້ວວ່າຈະຖອນອອກຈາກສັນຍານິວເຄຼຍອີຣານ, ແຕ່ສະຫະພາບເອີຣົບຄັດຄ້ານຕໍ່ການກະທຳຂອງລັດຖະບານທຣຳ ເຊິ່ງໄດ້ສະແດງໃຫ້ເຫັນວ່າ ສະຫະພາບເອີຣົບແມ່ນຈັດຕັ້ງປະຕິບັດພາຍໃຕ້ຂອບເຂດເພື່ອຜົນປະໂຫຍດຂອງຕົນ ແລະມີຄວາມຄິດທີ່ແຕກຕ່າງກັນກັບອາເມລິກາໃນບັນຫານິວເຄຼຍອີຣານ.
 |
