ວັນທີ 26 ມັງກອນນີ້, ທ່ານມີໂຮສລັຟ ລາຊັກ ປະທານສະມັດຊາໃຫຍ່ອົງການສະຫະປະຊາຊາດສະໄໝທີ 72 ໄດ້ອອກຖະແຫຼງການໂດຍຮຽກຮ້ອງໃຫ້ບັນດາປະເທດສະມາຊິກຈົ່ງຕອບຮັບຂໍ້ລິເລີ່ມ "ຢຸດຍິງເພື່ອໂອລິມປິກ"ໃນໄລຍະງານມະຫາກຳກິລາໂອລິມປິກລະດູໜາວແລະງານມະຫາກຳກິລາໂອລິມປິກຄົນພິການລະດູໜາວທີ່ຈະຈັດຂຶ້ນຢູ່ເມືອງພຽງຊາງ ສ ເກົາຫຼີໃນປີນີ້.
ໃນກອງປະຊຸມຄົບຄະນະສະມັດຊາໃຫຍ່ອົງການສະຫະປະຊາຊາດທີ່ຈັດຂຶ້ນໃນວັນທີ 26 ມັງກອນນີ້, ທ່ານລາຊັກໄດ້ຂຶ້ນອ່ານບົດຖະແຫຼງການຂອງຕົນວ່າ: ໃນຖານະເປັນປະທານສະມັດຊາໃຫຍ່ອົງການສະຫະປະຊາຊາດສະໄໝທີ 72, ຕົນຂໍຮຽກຮ້ອງຢ່າງເຄັ່ງຂຶມໃຫ້ທຸກປະເທດສະມາຊິກປະຕິບັດຕາມຄຳໝັ້ນສັນຍາທີ່ປະເທດຕົນໃຫ້ໄວ້ວ່າ: ຈະຢຸດຍິງໃນໄລຍະງານມະຫາກຳກິລາໂອລິມປິກລະດູໜາວແລະງານມະຫາກຳກິລາໂອລິມປິກຄົນພິການລະດູໜາວທີ່ພຽງຊາງ ສເກົາຫຼີ 2018ໂດຍປະຕິບັດຕົວຈິງໃນການສົ່ງເສີມສັນຕິພາບແລະຄວາມປອງດອງກົມກຽວກັນໃນທ້ອງຖິ່ນ, ປະເທດ, ພາກພື້ນກໍຄືໃນຂອບເຂດທົ່ວໂລກ. ຂະນະດຽວກັນ, ທ່ານລາຊັກຍັງໄດ້ຮຽກຮ້ອງໃຫ້ທຸກຝ່າຍທີ່ຍິງປະທະກັນໃນທົ່ວໂລກຈະເຫັນດີດ້ວຍຄວາມເດັດຂາດໃນການປະຕິບັດການຢຸດຍິງໃນໄລຍະງານກິລາໂອລິມປິກຢ່າງແທ້ຈິງເພື່ອສ້າງໂອກາດໃຫ້ແກ້ໄຂຄວາມຂັດແຍ້ງກັນດ້ວຍສັນຕິວິທີ.
ວັນທີ 13 ພະຈິກປີ 2017 ຜ່ານມາ, ກອງປະຊຸມສະມັດຊາໃຫຍ່ອົງການສະຫະປະຊາຊາດໄດ້ຜ່ານມະຕິໃນການເລັ່ງທວງໃຫ້ທຸກປະເທດສະມາຊິກປະຕິບັດການຢຸດຍິງແຕ່ຝ່າຍດຽວຫຼືທຸກຝ່າຍຢຸດຍິງພ້ອມກັນໃນໄລຍະກ່ອນພິທີເປີດງານໂອລິມປິກລະດູໜາວ 7 ວັນຕະຫຼອດຮອດ 7 ວັນຫຼັງປິດງານໂອລິມປິກຄົນພິການລະດູໜາວ.
 |
