ວັນທີ 26 ມັງກອນນີ້ຢູ່ສູນລະນຶກເຫດການສັງຫານໝູ່ນະຄອນຫຼວງບູດາແປັສປະເທດຮົງກາຣີ, ປະຊາຊົນຮົງກາຣີໄວ້ອາໄລເຖິງຜູ້ເສຍຊີວິດຈາກເຫດການສັງຫານໝູ່.
ກ່ອນວັນລະນຶກເຫດການສັງຫານໝູ່ສາກົນຈະມາເຖິງ, ທ່ານແອນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດໄດ້ປະກອບຄຳເຫັນຜ່ານທາງວິດີໂອໂດຍຮຽກຮ້ອງໃຫ້ປະຊາຄົມໂລກຮ່ວມກັນສະກັດກັ້ນບໍ່ໃຫ້ຄວາມບາດໝາງແຜ່ຂະຫຍາຍ.
ວັນທີ 27 ມັງກອນເປັນວັນລະນຶກເຫດການສັງຫານໝູ່ ສາກົນ. ທ່ານກູເຕີເຣັສ ກ່າວວ່າ, ອົງການສະຫະປະຊາຊາດໄວ້ອາໄລເຖິງຊາວຢິວ6 ລ້ານຄົນທີ່ເສຍຊີວິດໃນເຫດການສັງຫານໝູ່, ແລະຍັງມີຄົນຈຳນວນຫຼວງຫຼາຍຈົນນັບບໍ່ຖ້ວນເສຍຊີວິດໃນຍຸກແຫ່ງທາລຸນກຳແຜ່ຂະຫຍາຍໃນທົ່ວໂລກ. ເຖິງວ່າຊູ່ມື້ນີ້, ສົງຄາມໂລກາຄັ້ງທີສອງໄດ້ສິ້ນສຸດລົງຫຼາຍສິບປີແລ້ວກໍຕາມ, ແຕ່ລັດທິຕ້ານຊາວຢິວຍັງຄົງຕົວຢູ່ ຂະນະດຽວກັນ ອະຄະຕິຮູບແບບອື່ນໆກໍໄດ້ເພີ່ມຂຶ້ນຢ່າງຕໍ່ເນື່ອງ.
ທ່ານກູເຕີເຣັສກ່າວຕື່ມວ່າ: ພວກນາຊີໃໝ່, ກຸ່ມບູຊາຄົນຜິວຂາວ ແລະອິດທິກຳລັງອື່ນໆເປັນຜູ້ເຜີຍແຜ່ຄວາມບາດໝາງຫົວຮຸນແຮງຕົ້ນຕໍ. ແຕ່ໜ້າເສຍດາຍນັ້ນແມ່ນ ແນວຄິດຊົ່ວຮ້າຍເຫຼົ່ານີ້ກຳລັງກາຍເປັນແນວຄິດຫຼັກໃນສັງຄົມແລະການເມືອງຫຼາຍແຫ່ງໃນໂລກ. ພວກເຮົາຕ້ອງຮ່ວມມືກັນເພື່ອສະກັດກັ້ນບໍ່ໃຫ້ມີການຂະຫຍາຍຕົວຂອງຄວາມບາດໝາງແລະຫັນເປັນປົກກະຕິ.
ທ່ານກູເຕີເຣັສກ່າວເນັ້ນວ່າ: ປະຊາຊົນບັນດາປະເທດລ້ວນແຕ່ມີຄວາມຮັບຜິດຊອບໃນການຕໍ່ຕ້ານລັດທິເຊື້ອຊາດແລະຄວາມຮຸນແຮງຢ່າງວ່ອງໄວ,ຖືກຕ້ອງແລະເດັດຂາດໂດຍຜ່ານຈາກການສຶກສາຮ່ຳຮຽນແລະເພີ່ມຄວາມຮູ້ຄວາມສະຕິ, ທົ່ວໂລກຍ່ອມຈະສາມາດສ້າງອະນາຄົດທີ່ທຸກຄົນມີກຽດສັກສີ,ມີສິດທິມະນຸດແລະຢູ່ຮ່ວມກັນໂດຍສັນຕິໄດ້.