ຕາມຂ່າວ CRI: ກອງປະຊຸມສຸດຍອດສະຫະພາບອາຟຣິກາຄັ້ງທີ 30 ໄດ້ໄຂຂຶ້ນຢູ່ສຳນັກງານໃຫຍ່ສະຫະພາບອາຟຣິກາທີ່ນະຄອນຫຼວງອາດິສອາເບບາປະເທດເອທີໂອປີໃນວັນທີ 28 ມັງກອນນີ້.
ກອງປະຊຸມຍ່ອຍຕ່າງໆຂອງກອງປະຊຸມສຸດຍອດຄັ້ງນີ້ໄດ້ເນັ້ນຫົວຂໍ້ "ຍາດເອົາໄຊຊະນະໃນການຕໍ່ສູ້ຕ້ານການສໍ້ລາດບັງຫຼວງ: ເສັ້ນທາງພັດທະນາແບບຍືນຍົງຂອງການຫັນປ່ຽນຮູບແບບການພັດທະນາຂອງອາຟຣິກາ". ໃນກອງປະຊຸມສຸດຍອດທີ່ຈະດຳເນີນໄປເປັນເວລາ 2 ວັນ, ປະມຸກລັດບັນດາປະເທດຈະປຶກສາຫາລືແລະກຳນົດຂໍ້ຕົກລົງກ່ຽວກັບການປະຕິຮູບສະຫະພາບອາຟຣິກາ, ທະວີບອາຟຣິກາເຊື່ອມໂຍງເຂົ້າກັນ, ຕໍ່ຕ້ານການສໍ້ລາດບັງຫຼວງແລະບັນຫາອື່ນໆ.
ທ່ານມູຊາ ຟາກີ ປະທານຄະນະກຳມະການສະຫະພາບອາຟຣິກາກ່າວໃນພິທີໄຂປະຊຸມວ່າ, ປັດຈຸບັນການເຈລະຈາໄລຍະທີໜຶ່ງຂອງການສ້າງເຂດການຄ້າເສລີອາຟຣິກາໄດ້ຮັບຄວາມຄືບໜ້າສຳຄັນແລ້ວ, ໃນໄລຍະຈັດກອງປະຊຸມສຸດຍອດຄັ້ງນີ້ຈະມີການເຊັນສັນຍາກ່ຽວກັບເຂດການຄ້າເສລີ; ຂະນະດຽວກັນນັ້ນຕະຫຼາດຂົນສົ່ງທາງອາກາດເອກະພາບອາຟຣິກາຈະເລີ່ມເປີດນຳໃຊ້ໃນໄລຍະກອງປະຊຸມ. ທ່ານຍັງໄດ້ຮຽກຮ້ອງໃຫ້ກອງປະຊຸມສຸດຍອດຜ່ານການຮັບຮອງ ສັນຍາໜັງສືຜ່ານແດນແລະບຸກຄົນສັນຈອນໄປມາໂດຍເສລີຂອງອາຟຣິກາ.
 |
