ຕາມຂ່າວ CRI: ສະຖາບັນຄົ້ນຄວ້າຈໍລະຈອນສິນຄ້າສາກົນອາຊີໃຕ້ແລະອາຊີຕາເວັນອອກສຽງໃຕ້ຄຸນມິງຈິນແລະສະມາຄົມພັດທະນາ "ໜຶ່ງແລວທາງໜຶ່ງເສັ້ນທາງ"ມຽນມາໄດ້ຈັດພິທີເຊັນສັນຍາຮ່ວມມືຢູ່ນະຄອນຫຼວງຢາງກຸ້ງປະເທດມຽນມາໃນວັນທີ 28 ມັງກອນນີ້.
ທ່ານຫຼິວຈິ່ນຊິນ, ຫົວໜ້າສະຖາບັນຄົ້ນຄວ້າຈໍລະຈອນສິນຄ້າສາກົນອາຊີໃຕ້ແລະອາຊີຕາເວັນອອກສຽງໃຕ້ຄຸນມິງຈິນກ່າວໃນພິທີດັ່ງກ່າວວ່າ, ເປົ້າໝາຍທີ່ສອງຝ່າຍເຊັນສັນຍາຮ່ວມມືແມ່ນເພື່ອດຳເນີນການແລກປ່ຽນລະຫວ່າງຄັງປັນຍາອອງຝ່າຍໃຫ້ດີກວ່າເກົ່າ, ແລະສ້າງກົນໄກຮ່ວມມື, ຊ່ວຍເຫຼືອວິສາຫະກິດຈີນຮູ້ຈັກນະໂຍບາຍພັດທະນາແລະກົດໝາຍຂອງມຽນມາ, ພ້ອມກັນນັ້ນຮ່ວມກັນຈັດກິດຈະກຳໂຄສະນາໂຄງການລົງທຶນຢູ່ມຽນມາ, ແລະຊຸກຍູ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ" ແລະແລວທາງເສດຖະກິດຈີນ-ມຽນມາ.
ທ່ານທິນໂອ ປະທານສະມາຄົມພັດທະນາ "ໜຶ່ງແລວທາງໜຶ່ງເສັ້ນທາງ" ມຽນມາກ່າວວ່າ, ຍອດມູນຄ່າການລົງທຶນຂອງຈີນຕໍ່ມຽນມາເປັນອັນດັບໜຶ່ງໃນບັນດາປະເທດແລະພາກພື້ນທີ່ລົງທຶນຢູ່ມຽນມາ, ໃນອານາຄົດສະມາຄົມຕົນຈະສຸມກຳລັງເພື່ອສ້າງຊ່ອງທາງແລກປ່ຽນມິດຕະພາບລະຫວ່າງສອງປະເທດໂດຍເຮັດຄືດັ່ງທີ່ເຄີຍໄດ້ປະຕິບັດຜ່ານມາ.
ຂ່າວແຈ້ງວ່າ, ໃນພິທີດັ່ງກ່າວຈີນຍັງເປີດເຜີຍວ່າຈະມອບຢາແລະອຸປະກອນການແພດໃຫ້ແກ່ກອງທຶນໂດຄິນກີຂອງມຽນມາ.