ຕາມສື່ມວນຊົນທ້ອງຖິ່ນໄດ້ລາຍງານໃຫ້ຮູ້ວ່າ, ຕອນທ່ຽງວັນທີ 28 ມັງກອນນີ້, ກອງທັບລັດຖະບານ ແລະ ກຸ່ມປະກອບອາວຸດຂອງຄະນະກຳມະການຂ້າມຜ່ານພາກໃຕ້ເຢນເມນເກີດການປະທະກັນຮຸນແຮງຢູ່ນະຄອນຫຼວງຊົ່ວຄາວອາແດນ ແລະ ຢ່າງໜ້ອຍເຮັດໃຫ້ມີຜູ້ເສຍຊີວິດ 8 ຄົນ.
ປະຊາຊົນທ້ອງຖິ່ນບອກນັກຂ່າວວ່າ, ກອງປ້ອງກັນປະທານາທິບໍດີຂອງກອງທັບເຢນເມນໄດ້ຍິງກຸ່ມຜູ້ປະທ້ວງທີ່ສະໜັບສະໜູນຄະນະກຳມະການຂ້າມຜ່ານພາກໃຕ້ ແລະ ເຮັດໃຫ້ມີຜູ້ເສຍຊີວິດ ແລະ ບາດເຈັບຫຼາຍຄົນ. ຫຼັງຈາກນັ້ນ, ກຸ່ມປະກອບອາວຸດຂອງຄະນະກຳມະການຂ້າມຜ່ານພາກໃຕ້ໄດ້ເຂົ້າມາປ້ອງກັນກຸ່ມຜູ້ປະທ້ວງ ແລະ ຍິງປະທະກັນກັບກອງທັບລັດຖະບານ.
ຕອນບ່າຍມື້ດຽວກັນ, ທ່ານບິນ ດາເກີ ນາຍົກລັດຖະມົນຕີເຢນເມນໄດ້ຮຽກຮ້ອງໃຫ້ທຸກຝ່າຍຢຸດຍິງ ແລະ ຕ້ອງຢຸດຕິການປະທະກັນທັນທີ ແລະ ກັບຄືນທີ່ຕັ້ງຂອງຕົນໂດຍບໍ່ມີເງື່ອນໄຂ.
ກ່ອນຈະເກີດການປະທະກັນຫຼາຍຊົ່ວໂມງ, ລັດຖະບານເຢນເມນຫາກໍ່ອອກຄຳສັ່ງຢຸດຕິການເຄື່ອນໄຫວປະທ້ວງໂດຍສັນຕິຕໍ່ຄະນະກຳມະການຂ້າມຜ່ານພາກໃຕ້.
 |
