ສະຫະພັນໂທລະຄົມສາກົນຫຼືITUເປີດເຜີຍບົດລາຍງານໃນຫົວຂໍ້ "ເຕັກໂນໂລຊີຂໍ້ມູນຂ່າວສານແລະການສື່ສານ, ປະເທດດ້ອຍພັດທະນາແລະເປົ້າໝາຍການພັດທະນາແບບຍືນຍົງ: ປະເທດດ້ອຍພັດທະນາມີອິນເຕີເນັດທົ່ວເຖິງແລະສາມາດຮັບພາລະຄ່າອິນເຕີເນັດໄດ້" ເຊິ່ງລະບຸວ່າ: ຮອດທ້າຍປີ 2017ຜ່ານມາ, ອິນເຕີເນັດເຄື່ອນທີ່ໄດ້ປົກຄຸມປະຊາກອນຂອງປະເທດດ້ອຍພັດທະນາຫຼາຍກວ່າ 80%, ຜູ້ໃຊ້ໂທລະສັບເຄື່ອນທີ່ເພີ່ມຂຶ້ນເປັນປະມານ 700 ລ້ານເລກໝາຍ ກວມ 70%ຂອງປະຊາກອນທັງໝົດ.
ບົດລາຍງານລະບຸຕື່ມວ່າ: ເຕັກໂນໂລຊີຂໍ້ມູນຂ່າວສານແລະການສື່ສານໄດ້ເຮັດໃຫ້ປະເທດດ້ອຍພັດທະນາປະສົບຜົນສຳເລັດຢ່າງໃຫຍ່ຫຼວງໃນດ້ານການພັດທະນາ ໂດຍສະເພາະໃນຂົງເຂດການທະນາຄານ,ການຫຼຸດຜ່ອນຄວາມທຸກຍາກແລະການສົ່ງເສີມສຸຂະພາບ. ໃນປະເທດດ້ອຍພັດທະນາທັງໝົດຈຳນວນ 47 ປະເທດໃນໂລກລ້ວນແຕ່ໄດ້ມີການບໍລິການອິນເຕີເນັດ 3G ເຊິ່ງໄດ້ປົກຄຸມປະຊາກອນ 60%. ຄາດວ່າ ປະເທດເຫຼົ່ານີ້ຈະບັນລຸອັດຕາປົກຄຸມອິນເຕີເນັດຄວາມຖີ່ສູງແບບເຄື່ອນທີ່ສະເລ່ຍ 97% ແລະປະຊາຊົນມີອິນເຕີເນັດໃຊ້ໂດຍສາມາດຮັບພາລະ ຄ່າອິນເຕີເນັດໄດ້ກ່ອນປີ 2020.