ທ່ານເປັນຈາມິນ ເນຕັນຢາຮູ ນາຍົກລັດຖະມົນຕີອິສຣາແອນກ່າວໃນວັນທີ 29 ມັງກອນນີ້ວ່າ, ປະເທດຕົນຈະບໍ່ອະນຸຍາດໃຫ້ອີຣານປ່ຽນລີບັງເປັນ "ຖານທັບຂີປະນາວຸດໃຫຍ່".
ທ່ານເນຕັນຢາຮູ ໄດ້ໃຫ້ທັດສະນະດັ່ງກ່າວກ່ອນໄປຢ້ຽມຢາມຣັດເຊຍພຽງເປັນເວລາ 5 ຊົ່ວໂມງ.
ເດືອນສິງຫາປີຜ່ານມາ, ທ່ານເນຕັນຢາຮູ ໄດ້ກ່າວຕໍ່ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດໂອກາດຢ້ຽມຢາມອິສຣາແອນວ່າ, ອີຣານພວມສ້າງຕັ້ງໂຮງງານຜະລິດຂີປະນາວຸດຢູ່ຊີຣີແລະລີບັງ, ເປົ້າໝາຍແມ່ນເພື່ອໂຈມຕີອິສຣາແອນ. ແຕ່ວ່າລັດຖະບານອີຣານບໍ່ໄດ້ສະແດງຄວາມເຫັນກ່ຽວກັບຄວາມເວົ້າຂອງທ່ານເນຕັນຢາຮູແຕ່ຢ່າງໃດ.
ທ່ານເນຕັນຢາຮູ ກ່າວຢ້ຳໃນວັນທີ 29 ມັງກອນນີ້ວ່າ, ປະເທດຕົນຄັດຄ້ານອີຣານສົ່ງກຳລັງທະຫານໄປປະຈຳຢູ່ຊີຣີເຊິ່ງເປັນປະເທດໃກ້ຄຽງຢູ່ພາກເໜືອຂອງຕົນຢ່າງຮຸນແຮງ, ແລະປະເທດຕົນຈະປະຕິບັດການເຄື່ອນໄຫວນີ້ຢ່າງເດັດຂາດ.