ກອງປະຊຸມຍ່ອຍຕ່າງໆຂອງກອງປະຊຸມສຸດຍອດສະຫະພາບອາຟຣິກາຄັ້ງທີ 30 ທີ່ຈັດຂຶ້ນຢູ່ສຳນັກງານໃຫຍ່ທີ່ນະຄອນຫຼວງອາດິສອາເບບາປະເທດເອທີໂອບີນັ້ນ ໄດ້ອັດລົງໃນວັນທີ 29 ມັງກອນນີ້.
ໃນໄລຍະປະຊຸມ, ປະເທດສະມາຊິກສະຫະພາບອາຟຣິກາ ໄດ້ປຶກສາຫາລືກ່ຽວກັບສະຖານະການສໍ້ລາດບັງຫຼວງຂອງອາຟຣິກາ ທັງໄດ້ສະເໜີມາດຕະການຮັບມື, ນອກນັ້ນ, ຍັງໄດ້ເລີ່ມເປີດບໍລິການຕະຫຼາດຂົນສົ່ງທາງອາກາດພຽງໜຶ່ງດຽວຂອງອາຟຣິກາຢ່າງເປັນທາງການ ແລະຢ້ຳເຖິງຄວາມສຳຄັນທີ່ທຸກປະເທດສະມາຊິກຕ້ອງຮ່ວມກັນຕໍ່ຕ້ານລັດທິກໍ່ການຮ້າຍ.
ທ່ານ ພອລ ຄາກາເມ ປະທານໝູນວຽນຄົນໃໝ່ສະຫະພາບອາຟຣິກາ, ປະທານາທິບໍດີລູອານດາ ໄດ້ກ່າວໃນພິທີປິດກອງປະຊຸມສຸດຍອດວ່າ, ກອງປະຊຸມສຸດຍອດສະຫະພາບອາຟຣິກາຄັ້ງນີ້ ໄດ້ທຳການຕົກລົງທີ່ສຳຄັນຈຳນວນໜຶ່ງ ເຊິ່ງຈະມີຜົນດີຕໍ່ແຜ່ນດິນໃຫຍ່ອາຟຣິກາໃນການບັນລຸເປົ້າໝາຍພັດທະນາໄລຍະສັ້ນ, ໄລຍະກາງ ແລະຍາວ ແລະຊຸກຍູ້ຄວາມຈະເລີນຮຸ່ງເຮືອງຂອງອາຟຣິກາ.
ກອງປະຊຸມຍ່ອຍຕ່າງໆຂອງກອງປະຊຸມສຸດຍອດສະຫະພາບອາຟຣິກາຄັ້ງນີ້ ເນັ້ນຫົວຂໍ້ຄື "ຍາດເອົາໄຊຊະນະໃນການຕໍ່ສູ້ຕ້ານການສໍ້ລາດບັງຫຼວງ: ເສັ້ນທາງພັດທະນາແບບຍືນຍົງໃນການຫັນປ່ຽນອາຟຣິກາ" ແລະໄດ້ໄຂຂຶ້ນແຕ່ວັນທີ 22-29 ມັງກອນນີ້.
 |
