ສົມເດັດຊຸນຕັນຮາຊັນນານ ໂບນເກຍ ປະມຸກລັດບຣູໄນໄດ້ຖະແຫຼງຜ່ານທາງໂທລະພາບແຫ່ງຊາດໃນຕອນບ່າຍວັນທີ 30 ມັງກອນນີ້ໂດຍປະກາດປັບປຸງຄະນະລັດຖະບານຊຸດໃໝ່ຢ່າງກະທັນຫັນ ເຊິ່ງເຈົ້າໜ້າທີ່ອາວຸໂສຫຼາຍຄົນໃນຄະນະລັດຖະບານຖືກປົດຕຳແໜ່ງ.
ສົມເດັດຮາຊັນນານຢືນຢັນວ່າ: ອາຍຸການດຳລົງຕຳແໜ່ງຂອງລັດຖະບານຊຸດໃໝ່ຍັງເປັນເວລາ 5 ປີເໝືອນເດີມ, ຫວັງວ່າຄະນະລັດຖະບານຊຸດໃໝ່ຈະປະຕິບັດໜ້າທີ່ຕຳແໜງຕາມຄວາມຮັບຜິດຊອບ, ພະຍາຍາມສູ້ຊົນເພື່ອການພັດທະນາປະເທດຊາດກໍຄືເພື່ອຄວາມຜາສຸກຂອງປະຊາຊົນ. ແຕ່ທ່ານບໍ່ໄດ້ເປີດເຜີຍສາເຫດໃນການປັບປຸງຄະນະລັດຖະບານຢ່າງກະທັນຫັນວ່າເປັນຍ້ອນຫຍັງ.
ຄະນະລັດຖະບານຊຸດໃໝ່ໄດ້ມີການປັບປຸງຢ່າງຫຼວງຫຼາຍຄື ໃນຈຳນວນລັດຖະມົນຕີ 11 ຄົນຂອງຄະນະລັດຖະບານຊຸດຜ່ານມາ,ມີ 6 ຄົນຖືກປົດຕຳແໜ່ງ. ສ່ວນຮອງລັດຖະມົນຕີ 9 ຄົນມີ 4 ຄົນຖືກປົດຕຳແໜ່ງເຊິ່ງລວມທັງຮອງລັດຖະມົນຕີກະຊວງປ້ອງກັນປະເທດ. ທ່ານຮາຊັນນານຈະສືບຕໍ່ດຳລົງຕຳແໜ່ງເປັນນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ,ລັດຖະມົນຕີກະຊວງການຕ່າງປະເທດແລະການຄ້າ ແລະລັດຖະມົນຕີກະຊວງການເງິນ.