ວັນທີ 30 ມັງກອນນີ້ໃນໂອກາດໃຫ້ສຳພາດຕໍ່ນັກຂ່າວ, ທ່ານກ່ານຫຼິນ ສະມາຊິກສະພາປະຊາຊົນເຂດກວາງຊີ, ຫົວໜ້າຄະນະກຳມະການພັດທະນາການທ່ອງທ່ຽວເຂດປົກຄອງຕົນເອງເຜົ່າຈ້ວງກວາງຊີກ່າວວ່າ, ເຂດກວາງຊີແມ່ນເຂດລະດັບແຂວງຂອງຈີນພຽງໜຶ່ງດຽວທີ່ມີຊາຍແດນຕິດກັບປະເທດອາຊຽນທາງບົກແລະທາງທະເລ, ກວາງຊີຈະເສີມຂະຫຍາຍທ່າແຮງແລະຊຸກຍູ້ການພັດທະນາຕະຫຼາດທ່ອງທ່ຽວຈີນ-ອາຊຽນ, ເພີ່ມທະວີການແລກປ່ຽນແລະ ຮ່ວມມືດ້ານການທ່ອງທ່ຽວລະຫວ່າງສອງຝ່າຍ.
ທ່ານນາງຢາງຢ້ຽນຢ້ຽນ, ຮອງຫົວໜ້າສຳນັກງານເລຂາງານວາງສະແດງສິນຄ້າຈີນ-ອາຊຽນກ່າວວ່າ: "ປີ 2017, ນັກທ່ອງທ່ຽວຈີນໄປທ່ຽວອາຊຽນໄດ້ເພີ່ມຂຶ້ນຢ່າງຫຼວງຫຼາຍ, ໃນນັ້ນຫວຽດນາມ, ໄທ, ກຳປູເຈຍແລະອື່ນໆໄດ້ຕ້ອນຮັບນັກທ່ອງທ່ຽວຈີນເພີ່ມຂຶ້ນຢ່າງຫຼວງຫຼາຍ"
ໃນຫຼາຍປີຜ່ານມາ, ເຂດກວາງຊີຂອງຈີນໄດ້ເລັ່ງລັດການຮ່ວມມືການທ່ອງທ່ຽວຂ້າມຊາດກັບຫວຽດນາມ, ປັດຈຸບັນ, ເຂດຮ່ວມມືທ່ອງທ່ຽວຂ້າມຊາດນ້ຳຕົກຕາດເຕີທ່ຽນ-ບັນຣຸກຈີນ-ຫວຽດນາມ, ເຂດຮ່ວມມືທ່ອງທ່ຽວສາກົນດ່ານມິດຕະພາບຈີນ-ຫວຽດນາມແລະໂຄງການທ່ອງທ່ຽວຊາຍແດນສຳຄັນຕ່າງໆໄດ້ເລັ່ງລັດພັດທະນາ. ນອກນີ້, ເຂດກວາງຊີແລະຫວຽດນາມຍັງໄດ້ຮ່ວມກັນພັດທະນາໂຄງການທ່ອງທ່ຽວການປະຕິວັດສາກົນອີກດ້ວຍ.
 |
