ວັນທີ 29 ມັງກອນນີ້, ກະຊວງດິນແດນແລະຄວາມໝັ້ນຄົງອາເມລິກາປະກາດວ່າ, ຍົກເລີກຄຳສັ່ງຫ້າມເຂົ້າແດນຕໍ່ຊາວອົບພະຍົບຂອງ 11 ປະເທດທີ່ມີຄວາມສ່ຽງສູງ, ພ້ອມທັງຈະປະຕິບັດຂັ້ນຕອນການຄັດເລືອກທີ່ເຂັ້ມງວດກວ່າເກົ່າ ເພື່ອຫຼີກລ້ຽງບໍ່ໃຫ້ພວກຫົວຮຸນແຮງແລະພວກຕ້ອງໂທດເຂົ້າແດນອາເມລິກາ.
ທ່ານ ເຄີສເຈັນ ນິວເຊັນ ລັດຖະມົນຕີກະຊວງດິນແດນແລະຄວາມໝັ້ນຄົງອາເມລິກາໄດ້ອອກຖະແຫຼງການໃນວັນທີ 29 ມັງກອນນີ້ວ່າ, ການທີ່ປະຕິບັດຂັ້ນຕອນຄັດເລືອກທີ່ເຂັ້ມງວດກວ່າເກົ່ານັ້ນ ຈະເຮັດໃຫ້ຜູ້ທີ່ມີເຈຕະນານຳໃຊ້ແຜນການຊາວອົບພະຍົບນັ້ນປະສົບຄວາມຫຍຸ້ງຍາກຫຼາຍກວ່າເກົ່າໃນການເຂົ້າອາເມລິກາ ແລະມາດຕະການປ້ອງກັນຄວາມໝັ້ນຄົງທີ່ວາງອອກປະຕິບັດບົນພື້ນຖານການປະເມີນຄວາມສ່ຽງເຫຼົ່ານີ້ ຈະຮັບປະກັນຄວາມໝັ້ນຄົງຂອງອາເມລິກາ.
ມາດຕະການປ້ອງກັນຄວາມໝັ້ນຄົງເຫຼົ່ານີ້ລວມທັງ: ຕ້ອງເຂັ້ມງວດໃນການສຳພາດສະມາຊິກຄອບຄົວຂອງຜູ້ຮ້ອງຂໍ, ກວດກາແລະກຳນົດຄືນໃໝ່ບັນຊີແລະມາດຕະຖານຄັດເລືອກປະເທດທີ່ມີຄວາມສ່ຽງສູງດ້ານຊາວອົບພະຍົບຕາມເວລາກຳນົດ.
ແຕ່ຖະແຫຼງການດັ່ງກ່າວບໍ່ໄດ້ເປີດເຜີຍໃຫ້ຮູ້ວ່າ 11 ປະເທດທີ່ຖືກຍົກເລີກຄຳສັ່ງຫ້າມຊາວອົບພະຍົບເຂົ້າແດນອາເມລິການັ້ນ ມີປະເທດໃດແດ່.
 |
