ຕາມຄຳສັ່ງຫ້າມສູບຢາຢູ່ຕາມຫາດຊາຍແຄມທະເລ ທີ່ກະຊວງຊັບພະຍາກອນທຳມະຊາດແລະສິ່ງແວດລ້ອມໄທປະກາດວ່າ: ເລີ່ມແຕ່ວັນທີ 1 ກຸມພານີ້ເປັນຕົ້ນໄປ,ຫ້າມບໍ່ໃຫ້ສູບຢາຢູ່ຕາມຫາດຊາຍແຄມທະເລ 24 ແຫ່ງຂອງ 15 ແຂວງເພື່ອແກ້ໄຂບັນຫາມົນລະພິດແລະເຮັດໃຫ້ສິ່ງແວດລ້ອມຢູ່ຕາມຫາດຊາຍແຄມທະເລໃຫ້ດີຂຶ້ນ.
ຕາມຄຳສັ່ງດັ່ງກ່າວ: ຫ້າມບໍ່ໃຫ້ປະຊາຊົນ ແລະນັກທ່ອງທ່ຽວສູບຢາຢູ່ຕາມຫາດຊາຍແຄມທະເລ 24 ແຫ່ງ ທີ່ເປັນແຫຼ່ງທ່ອງທ່ຽວຊື່ດັງຕ່າງໆເຊັ່ນ ຫົວຫີນ, ພັດທະຍາ, ເກາະສະໝຸຍ, ພັງງາ,ພູເກັດ,ກຣະບີແລະອື່ນໆ, ຜູ້ລະເມີດຈະຖືກປັບໃໝໜຶ່ງແສນບາດຫຼືຕັດອິດສະຫຼະພາບບໍ່ເກີນ 1 ປີ ຫຼືລົງໂທດທັງສອງຢ່າງ.
ວັນທີ 2 ພະຈິກປີຜ່ານມາ, ເວັບໄຊລັດຖະບານໄທໄດ້ເປີດເຜີຍຄຳສັ່ງດັ່ງກ່າວແລະເລີ່ມປະຕິບັດແຕ່ວັນທີ 1 ກຸມພານີ້ຢ່າງເປັນທາງການ.