ວັນທີ 1 ກຸມພານີ້, ຢູ່ນະຄອນຫຼວງປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານນາງເທເຣຊາ ເມ ນາຍົກລັດຖະມົນຕີອັງກິດໂອກາດເດີນທາງມາຢ້ຽມຢາມຈີນຢ່າງເປັນທາງການ ຖືວ່າເປັນການພົບປະເທື່ອທີ 3 ລະຫວ່າງຜູ້ນຳສອງປະເທດຫຼັງກອງປະຊຸມສຸດຍອດກຸ່ມ G20 ທີ່ເມືອງຫາງໂຈ່ວ ສປ ຈີນແລະກອງປະຊຸມສຸດຍອດທີ່ເມືອງແຮມເບີກເຢຍລະມັນ.
ທ່ານສີຈິ້ນຜິງຢືນຢັນວ່າ: ຈີນແລະອັງກິດຄວນໄປຕາມຍຸກສະໄໝໂດຍອີງຕາມຄວາມຮຽກຮ້ອງຕ້ອງການໃນໄລຍະການພັດທະນາຂອງປະເທດໃຜລາວແລະການຮ່ວມມືລະຫວ່າງສອງຝ່າຍເພື່ອຮ່ວມກັນສ້າງຄວາມເຂັ້ມແຂງໃຫ້ແກ່ຍຸກຄຳແຫ່ງການພົວພັນລະຫວ່າງສອງປະເທດ, ພະຍາຍາມສູ້ຊົນຊຸກຍູ້ສາຍພົວພັນຈີນ-ອັງກິດໃຫ້ພັດທະນາຢ່າງປອດໃສແລະໝັ້ນທ່ຽງໃນຍຸກໃໝ່. ທ່ານສີຈິ້ນຜິງຍັງຊີ້ໃຫ້ເຫັນວ່າ: ສອງຝ່າຍສາມາດຮ່ວມມືກັນແບບຕ່າງຝ່າຍຕ່າງມີຜົນປະໂຫຍດໃນຂອບ "ໜຶ່ງແລວທາງໜຶ່ງເສັ້ນທາງ"ໃຫ້ກວ້າງອອກກວ່າເກົ່າ, ມີລະດັບສູງກວ່າເກົ່າແລະລົງເລິກກວ່າເກົ່າ.
ທ່ານນາງເທເຣຊາ ເມ ເຫັນດີຕໍ່ການຕີລາຄາສາຍພົວພັນອັງກິດ-ຈີນຂອງທ່ານປະທານສີຈີ້ນຜິງ ແລະຢືນຢັນວ່າ ອັງກິດມີຄວາມເຫັນຄ້າຍຄືກັນກັບຈີນໃນຫຼາຍບັນຫາທີ່ມີລັກສະນະທົ່ວໂລກ, ສອງຝ່າຍກຳລັງຜະເຊີນກັບສິ່ງທ້າທາຍຫຼາຍຢ່າງໃນໂລກ ແລະສາມາດຮ່ວມມືກັນພະຍາຍາມຮັບມືແກ້ໄຂບັນຫາສຳຄັນໃນສາກົນແລະພາກພື້ນ ທັງຢືນຢັນວ່າ ອັງກິດຍິນດີຮ່ວມກັບຈີນເພີ່ມທະວີການຮ່ວມມືຕົວຈິງໃນຫຼາຍຂົງເຂດເປັນຕົ້ນ ການຄ້າ,ການລົງທຶນ, ວິທະຍາສາດເຕັກໂນໂລຊີ,ສິ່ງແວດລ້ອມ,ວັດທະນະທຳສັງຄົມ, ອິນເຕີເນັດແລະອື່ນໆ.