ກອງປະຊຸມສະພາປະຊາຊົນແຫ່ງຊາດຈີນຄັ້ງທີ 1 ຊຸດທີ 13 ຈະໄຂຂຶ້ນຢູ່ນະຄອນຫຼວງປັກກິ່ງໃນວັນທີ 5 ມີນາ ແລະ ກອງປະຊຸມຄະນະກຳມະການທົ່ວປະເທດຄັ້ງທີ 1 ຊຸດທີ 13 ສະພາປຶກສາການເມືອງປະຊາຊົນແຫ່ງຊາດຈີນ ຈະໄຂຂຶ້ນໃນວັນທີ 3 ມີນາປີນີ້. ດັ່ງນັ້ນ, ຫ້ອງການຄະນະປະຈຳສະພາປະຊາຊົນແຫ່ງຊາດຈີນ ແລະຫ້ອງການສະພາປຶກສາການເມືອງປະຊາຊົນແຫ່ງຊາດຈີນ ຈຶ່ງໄດ້ປະກາດໃນວັນທີ 1 ກຸ່ມພານີ້ວ່າ, ຍິນດີຕ້ອນຮັບນັກຂ່າວພາຍໃນແລະຕ່າງປະເທດທີ່ຈະມາຮ່ວມເກັບກຳຂ່າວແລະຂໍສຳພາດຜູ້ແທນທີ່ຮ່ວມປະຊຸມ.
ກອງປະຊຸມສອງສະພາດັ່ງກ່າວ ຈະສ້າງຕັ້ງສູນຖະແຫຼງຂ່າວຢູ່ໂຮງແຮມມີເດຍທີ່ຕັ້ງຢູ່ເລກທີ ຂ-11 ຖະໜົນຟູຊິ່ງນະຄອນຫຼວງປັກກິ່ງ ເພື່ອ ຕ້ອນຮັບແລະຈັດວາງນັກຂ່າວພາຍໃນແລະຕ່າງປະເທດທີ່ມາເກັບກຳຂ່າວ ແລະສູນດັ່ງກ່າວຈະເລີ່ມດຳເນີນງານຢ່າງເປັນທາງການໃນວັນທີ 27 ກຸມພານີ້.
ນັກຂ່າວທີ່ຕ້ອງການສຳພາດຂ່າວກອງປະຊຸມສອງສະພານັ້ນ ຕ້ອງໄດ້ສະເໜີຄຳຮ້ອງຂໍ, ໃນນັ້ນ, ນັກຂ່າວຕ່າງປະເທດປະຈຳຈີນ ຕ້ອງຮ້ອງຂໍຕໍ່ສູນຖະແຫຼງຂ່າວ, ນັກຂ່າວຕ່າງປະເທດທີ່ມາຈີນຊົ່ວຄາວ ຕ້ອງໄດ້ສະເໜີຄຳຮ້ອງຂໍຕໍ່ສະຖານທູດ, ສະຖານກົງສຸນ ຫຼືອົງການອອກວິຊາທີ່ກະຊວງການຕ່າງປະເທດຈີນມອບສິດປະຈຳປະເທດຕົນ, ການສະເໜີຄຳຮ້ອງຂໍຈະໝົດກຳນົດໃນວັນທີ 25 ກຸມພານີ້.
ເພື່ອອຳນວຍຄວາມສະດວກແກ່ນັກຂ່າວ, ເວັບໄຊຂອງສູນຖະແຫຼງຂ່າວສອງກອງປະຊຸມ ຈະພົສຂໍ້ມູນຂ່າວສານທີ່ກ່ຽວຂ້ອງຢ່າງທັນການ.
ທີ່ຢູ່ເວັບໄຊຂອງສູນຖະແຫຼງຂ່າວກອງປະຊຸມສະພາປະຊາຊົນແຫ່ງຊາດຈີນຄັ້ງທີ 1 ຊຸດທີ 13 ຄື: http://www.npc.gov.cn/pc/13_1
ທີ່ຢູ່ເວັບໄຊຂອງສູນຖະແຫຼງຂ່າວກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນຄັ້ງທີ 1 ຊຸດທີ 13 ຄື: http://www.cppcc.gov.cn