ວັນທີ 4 ກຸມພານີ້, ທ່ານ ນົບພະດົມ ເທບພິທັກ ທະນາຍຄວາມຂອງທ່ານນາງ ຍິ່ງລັກ ຊິນນະວັດ ອະດີດນາຍົກລັດຖະມົນຕີໄທກ່າວວ່າ: ຄະນະທະນາຍຄວາມຂອງທ່ານນາງ ຍິ່ງລັກ ຊິນນະວັດ ຈະສືບຕໍ່ຮ້ອງຟ້ອງຕໍ່ສານ ເພື່ອຮ້ອງຂໍຍົກເລີກຫຼືຢຸດຕິການປະຕິບັດດຳລັດທີ່ອາຢັດຊັບສິນຂອງທ່ານນາງຍິ່ງລັກເປັນການຊົ່ວຄາວ.
ທ່ານ ນົບພະດົນ ກ່າວຕື່ມວ່າ: ປັດຈຸບັນ,ຄະດີກ່ຽວກັບການອາຢັດຊັບສິນຂອງທ່ານນາງ ຍິ່ງລັກ ຊິນນະວັດຍັງຢູ່ໃນໄລຍະການສືບສວນຢູ່, ລັດຖະບານໄທໄດ້ອາຢັດຊັບສິນຂອງທ່ານນາງຍິ່ງລັກໂດຍຜ່ານດຳລັດບໍລິຫານງານກ່ອນການຕັດສິນຈາກສານນັ້ນ ບໍ່ສອດຄ່ອງກັບຂັ້ນຕອນກົດໝາຍ. ທ່ານເຜີຍໃຫ້ຮູ້ວ່າ: ປັດຈຸບັນ ລັດຖະບານໄດ້ອາຢັດເອົາເຮືອນ,ທີ່ດິນ,ເງິນໃນບັນຊີທະນາຄານ 10 ກວ່າບັນຊີຂອງທ່ານນາງຍິ່ງລັກແລະອື່ນໆລວມທັງໝົດ 30 ກວ່າລາຍການ.