ວັນທີ 5 ກຸມພານີ້, ທຳນຽບປະທານາທິບໍດີຊົງວາເດ ສ ເກົາຫຼີໄດ້ສະແດງຄວາມຍິນດີຕ້ອນຮັບທ່ານກິມຢົງນາມ ປະທານຄະນະກຳມະການປະຈຳສະພາປະຊາຊົນສູງສຸດ ສປປ ເກົາຫຼີພ້ອມດ້ວຍຄະນະທີ່ຈະຢ້ຽມຢາມ ສ ເກົາຫຼີໃນໄລຍະຈັດງານກິລາໂອລິມປິກລະດູໜາວພຽງຊາງ.
ໃນງານຖະແຫຼງຂ່າວທີ່ຈັດຂຶ້ນໃນວັນທີ 5 ກຸມພານີ້, ທ່ານກິມອີກຽມ ໂຄສົກທຳນຽບຊົງວາເດກ່າວວ່າ, ທ່ານກິມຢົງນາມແມ່ນເຈົ້າໜ້າທີ່ ສປປ ເກົາຫຼີລະດັບສູງສຸດທີ່ຢ້ຽມຢາມ ສ ເກົາຫຼີໃນປະຫວັດສາດ. ທ່ານກ່າວວ່າ, ທ່ານກິມຢົງນາມຢ້ຽມຢາມປະເທດຕົນສະແດງໃຫ້ເຫັນຄວາມປາດຖະໜາຂອງ ສປປ ເກົາຫຼີທີ່ຢາກປັບປຸງສາຍພົວພັນເໜືອໃຕ້ໃຫ້ດີຂຶ້ນແລະເຮັດງານກິລາໂອລິມປິກລະດູໜາວສຳເລັດຜົນຢ່າງຈົບງາມ, ທັງໄດ້ສະແດງໃຫ້ເຫັນທ່າທີຢ່າງຈິງໃຈຂອງ ສປປ ເກົາຫຼີ.
ທ່ານກິມອີກຽມກ່າວຕື່ມວ່າ, ໃນຖານະເປັນເຈົ້າພາບຂອງງານກິລາໂອລິມປິກລະດູໜາວຄັ້ງນີ້, ປະເທດຕົນຈະຕ້ອນຮັບຄະນະຜູ້ແທນ ສປປ ເກົາຫຼີຢ່າງສົມກຽດ, ພ້ອມກັນນັ້ນຈະກຽມພ້ອມໃຫ້ແກ່ໂອກາດແລກປ່ຽນຕ່າງໆລະຫວ່າງເຈົ້າໜ້າທີ່ລະດັບສູງຂອງສອງປະເທດ. ລັດຖະບານປະເທດຕົນຫວັງວ່າການຢ້ຽມຢາມຂອງທ່ານກິມຢົງນາມຈະສາມາດສ້າງໃຫ້ງານກິລາໂອລິມປິກລະດູໜາວພຽງຊາງກາຍເປັນ "ງານກິລາໂອລິມປິກແຫ່ງສັນຕິພາບ" ແລະກາຍເປັນໂອກາດທີ່ຊຸກຍູ້ໃຫ້ສາຍພົວພັນເໜືອໃຕ້ຂະຫຍາຍຕົວຢ່າງຕໍ່ເນື່ອງແລະສ້າງສັນຕິພາບຖາວອນຂອງແຫຼມເກົາຫຼີ.
 |
