ທ່ານນາງຈັນຕາວັນຊຸຊາຣິທະກູນ ຜູ້ຊ່ວຍ ຜູ້ວ່າການທະນາຄານກາງແຫ່ງປະເທດໄທກ່າວຢູ່ນະຄອນຫຼວງບາງກອກໃນວັນທີ 5 ກຸມພານີ້ວ່າ ທະນາຄານກາງໄທສະແດງຄວາມຊົມເຊີຍຕໍ່ທະນາຄານປະຊາຊົນຈີນທີ່ອະນຸມັດປະຕິບັດການຊື້ຂາຍລະຫວ່າງເງິນຢວນກັບເງິນບາດໄທໂດຍກົງ ເຊິ່ງເປັນມາດຕະການທີ່ຈະປະກອບສ່ວນເຂົ້າໃນການຊຸກຍູ້ການຮ່ວມມືດ້ານການຄ້າແລະການລົງທຶນລະຫວ່າງສອງປະເທດຂະຫຍາຍຕົວຕື່ມອີກ.
ທະນາຄານປະຊາຊົນຈີນປະກາດໃນເມື່ອໆນີ້ວ່າ: ເລີ່ມແຕ່ວັນທີ 5 ກຸມພານີ້ເປັນຕົ້ນໄປຈະຂະຫຍາຍການຄ້າລະຫວ່າງເງິນຢວນກັບເງິນບາດໃນພາກພື້ນໃຫ້ເປັນການຊື້ຂາຍໂດຍກົງ, ທ່ານນາງຈັນຕາວັນໄດ້ເວົ້າຕໍ່ສື່ມວນຊົນໃນວັນທີ 5 ກຸມພານີ້ວ່າ: ຫຼັງປະຕິບັດການຊື້ຂາຍລະຫວ່າງເງິນຢວນກັບເງິນບາດໂດຍກົງແລ້ວ, ເຂດການຄ້າຈາກແຂວງຢຸນນານຈີນໄດ້ເປີດກວ້າງທົ່ວປະເທດຈີນ ແລະສະຖາບັນການເງິນທີ່ມີຄຸນວຸດທິເປີດການຊື້ຂາຍລະຫວ່າງເງິນຢວນກັບເງິນບາດໃນຕະຫຼາດເງິນຕາຕ່າງປະເທດຂອງຈີນນັ້ນຈະເພີ່ມຫຼາຍຂຶ້ນ, ເງິນຢວນແລະເງິນບາດຈະຖືກນຳໃຊ້ຫຼາຍຂຶ້ນໃນການຄ້າແລະການລົງທຶນລະຫວ່າງສອງປະເທດ, ຄວາມສ່ຽງດ້ານອັດຕາແລກປ່ຽນເງິນຕາຂອງການຮ່ວມມືດ້ານເສດຖະກິດການຄ້າລະຫວ່າງສອງປະເທດກໍຈະຫຼຸດລົງຢ່າງຫຼວງຫຼາຍ. ປັດຈຸບັນ, ຈີນເປັນຄູ່ການຄ້າໃຫຍ່ທີ່ສຸດຂອງໄທ, ດ້ວຍເຫດນີ້,ມາດຕະການດັ່ງກ່າວຈິ່ງມີຄວາມໝາຍສຳຄັນຫຼາຍຕໍ່ການຮັດແໜ້ນການຮ່ວມມືດ້ານເສດຖະກິດການຄ້າລະຫວ່າງໄທ-ຈີນຕື່ມອີກ.
 |
