ວັນທີ 6 ກຸມພານີ້, ທ່ານ ນາຈິບ ຕຸນ ຣາຊັກ ນາຍົກລັດຖະມົນຕີມາເລເຊຍໄດ້ປະກາດວ່າ: ມາເລເຊຍແລະສິງກະໂປຈະສ້າງກົນໄກການເຊື່ອມຈອດຕະຫຼາດຫຸ້ນລະຫວ່າງສອງປະເທດ,ເພື່ອຊຸກຍູ້ການລົງທຶນ.
ທ່ານ ນາຈິບ ຕຸນ ຣາຊັກ ກ່າວໃນກອງປະຊຸມປຶກສາຫາລືຫົວຂໍ້ສະເພາະທີ່ຈັດຂຶ້ນຢູ່ຄະນະກຳມະການຫຼັກຊັບມາເລເຊຍໃນມື້ດັ່ງກ່າວ ໂດຍຮ່ວມກັບທ່ານ ລີຊຽນລຸງ ນາຍົກລັດຖະມົນຕີສິງກະໂປເຫັນດີເປັນເອກະພາບກັນວ່າ, ຕະຫຼາດຫຸ້ນຂອງສອງປະເທດໄດ້ພັດທະນາຂຶ້ນຮອດລະດັບທີ່ເໝາະສົມໃນການສ້າງກົນໄກການເຊື່ອມຈອດກັນ.
ທ່ານ ນາຈິບ ກ່າວວ່າ: ຕະຫຼາດຫຼັກຊັບທີ່ກ່ຽວພັນເຖິງກົນໄກດັ່ງກ່າວລວມມີວິສາຫະກິດ 1.600 ກວ່າແຫ່ງ ເຊິ່ງມີມູນຄ່າເຖິງ 1.200 ຕື້ໂດລາສະຫະລັດ. ກົນໄກໃໝ່ຈະສະໜອງທາງເລືອກດ້ານການລົງທຶນໃຫ້ແກ່ນັກລົງທຶນຫຼາຍກວ່າເກົ່າ ຊຸກຍູ້ການຄ້າແລະລະດັບຄວາມຄຶກຄັກຂອງຕະຫຼາດ ສອງປະເທດ.