ຈີນນັບມື້ນັບຖືກຍົກຍ້ອງໃຫ້ເປັນໜຶ່ງໃນບັນດາປະເທດທີ່ປອດໄພທີ່ສຸດໃນໂລກ ແຕ່ໃນ"ຕາຕະລາງຈັດອັນດັບຄວາມປອດໄພຂອງໂລກ" ນັ້ນ, ຈີນເປັນປະເທດທີ່ໃຊ້ຈ່າຍໃນລະດັບຕ່ຳທີ່ສຸດໃນໂລກໃນດ້ານການປະກອບກຳລັງຕຳຫຼວດ ເພື່ອຮັກສາຄວາມເປັນລະບຽບຮຽບຮ້ອຍໃນສັງຄົມປະເທດຕົນ. ຄັນຊັ້ນ, ຈີນເຮັດແນວໃດຈຶ່ງສາມາດເຮັດໃຫ້ສັງຄົມມີຄວາມສະຫງົບຮຽບຮ້ອຍດີ ແຕ່ພັດໃຊ້ກຳລັງຕຳຫຼວດບໍ່ຫຼາຍປານໃດ?
ປີ 2017, ຈີນສືບຕໍ່ເປັນໜຶ່ງໃນບັນດາປະເທດທີ່ມີອັດຕາການເກີດຄະດີຄາດຕະກຳໃນລະດັບຕ່ຳທີ່ສຸດໃນໂລກ ໂດຍຄະດີຕ້ອງໂທດດ້ວຍຄວາມຮຸນແຮງຢ່າງໜັກໜ່ວງໄດ້ຫຼຸດລົງ 51,8% ເມື່ອທຽບໃສ່ປີ 2012, ປະຊາຊົນມີຄວາມເພິ່ງພໍໃຈຕໍ່ຄວາມສະຫງົບໃນສັງຄົມໄດ້ເພີ່ມຂຶ້ນເປັນ 95,55%. ທ່ານຫວາງຕ້າເຫວີຍ ສາສະດາຈານມະຫາວິທະຍາໄລຄວາມປອດໄພປະຊາຊົນຈີນ ເຫັນວ່າ ບໍ່ວ່າຈະຕີລາຄາດັດຊະນີຈາກອັດຕະວິໄສ ຫຼື ພາວະວິໄສກໍຕາມ, "ດັດຊະນີຄວາມປອດໄພ" ຂອງສັງຄົມໃນປະເທດຈີນລ້ວນແຕ່ຢູ່ແຖວໜ້າຂອງໂລກ.
ຍັງມີນັກການເມືອງສຳຄັນຫຼາຍປະເທດ ແລະ ຜູ້ຊ່ຽວຊານພາຍໃນແລະຕ່າງປະເທດບໍ່ໜ້ອຍ ກໍມີທັດສະນະຄືກັນກັບທ່ານຫວາງຕ້າເຫວີຍ ແລະໄດ້ມີການຕີລາຄາວ່າ: ການທີ່ເສດຖະກິດພັດທະນາຢ່າງວ່ອງໄວ ແລະ ສັງຄົມມີຄວາມສະຫງົບໂດຍລວມ ແມ່ນເລື່ອງອັດສະຈັນສອງຢ່າງຂອງຈີນທີ່ສະແດງໃຫ້ໂລກໄດ້ຮູ້ໄດ້ເຫັນ. ຂະນະທີ່ສິ່ງທີ່ເປັນເລື່ອງ "ອັດສະຈັນ" ດັ່ງກ່າວນັ້ນ, ມີຄວາມຈິງທີ່ບໍ່ຄວນເບິ່ງຂ້າມ ນັ້ນກໍຄື ລະດັບການປະກອບກຳລັງຕຳຫຼວດຂອງຈີນຕ່ຳກວ່າລະດັບຂອງໂລກຢ່າງຫຼວງຫຼາຍ ແລະ ເມື່ອທຽບກັບປະເທດອື່ນໆແລ້ວ, ລາຍຈ່າຍທີ່ໃຊ້ໃນການຮັກສາຄວາມປອດໄພສາທາລະນະ ແລະ ຄວາມສະຫງົບໃນສັງຄົມຂອງຈີນກວມGDP ກໍຕຳຫຼາຍ.
ປ້າຫວາງ ປີນີ້ອາຍຸ 71 ປີ, ເພິ່ນເປັນຄົນມີຄວາມຫ້າວຫັນໃນການຊ່ວຍຮັກສາຄວາມສະຫງົບຢູ່ບໍລິເວນລິ້ວຫຼີຖຸນ ເຂດເສົາຢາງ ນະຄອນຫຼວງປັກກິ່ງ. ກ່ອນນີ້ບໍ່ດົນ, ປ້າຫວາງໄດ້ພົບຊາຍໜຸ່ມຄົນໜຶ່ງທີ່ຫາກໍຍ້າຍມາຢູ່ເຂດຊຸມຊົນທີ່ຕົນຊ່ວຍລາດຕະເວນ ເຊິ່ງຊາຍໜຸ່ມຄົນນີ້ແຕ່ລະມື້ກໍບໍ່ມີວຽກຫຍັງທີ່ຈະເຮັດ ພຽງແຕ່ຍ່າງເຂົ້າໆອອກໆເຂດຊຸມຊົນນີ້, ບາງເທື່ອກັບຄືນເມືອເຮືອນພ້ອມຄົນອື່ນ ແລະ ບໍ່ດົນກໍອອກໄປອີກ. ນອກນີ້, ຊາຍໜຸ່ມທີ່ຢູ່ຜູ້ດຽວຄົນນັ້ນ ຍາມໃດກໍສັ່ງຊື້ອາຫານໃຫ້ເພື່ອຫຼາຍຄົນ. ເມື່ອເຫັນແນວນັ້ນ, ປ້າຫວາງ ກໍລາຍງານຕໍ່ ຕຳຫຼວດປະຈຳເຂດຊຸມຊົນທັນທີ. ຂະນະທີ່ເມື່ອເຈົ້າໜ້າທີ່ຕຳຫຼວດໄດ້ສືບສວນ-ສອບສວນຢ່າງລະອຽດແລ້ວ ກໍສາມາດຮື້ຖອນກຸ່ມແກງຄ້າປະເວນີທີ່ປະກອບດ້ວຍຊາຍໜຸ່ມຄົນນັ້ນພ້ອມສາວຂາຍປະເວນີ 6 ຄົນໄດ້ຢ່າງສຳເລັດ.
ມີຂ່າວລາຍງານວ່າ ມາຮອດທ້າຍປີ 2017, ປະຊາຊົນຜູ້ມີຄວາມຫ້າວຫັນໃນການເຂົ້າຮ່ວມການຮັກສາຄວາມສະຫງົບຂອງສັງຄົມຢູ່ເຂດເສົາຢາງ ນະຄອນຫຼວງປັກກິ່ງທີ່ໄດ້ຈົດທະບຽນນັ້ນມີເຖິງ 140.000 ກວ່າຄົນແລ້ວ ໂດຍມີເກືອບ 300 ຄົນສະເລ່ຍຕໍ່ໜຶ່ງກິໂລຕາແມັດ ແລະຖືກເອີ້ນວ່າເປັນ "ປະຊາຊົນເສົາຢາງ".
ນອກຈາກມີ "ປະຊາຊົນເສົາຢາງ" ທີ່ມີຊື່ສຽງແລ້ວ, ຜົນການຄົ້ນຄວ້າວິທະຍາສາດ-ເຕັກນິກຈຳນວນໜຶ່ງ ເປັນຕົ້ນ ລະບົບ "ທ່ຽນຫວາງ", ຍົນບໍ່ມີຄົນຂັບ, ຖານຂໍ້ມູນໃຫຍ່(Big data) ແລະອື່ນໆ ກໍໄດ້ນຳໃຊ້ເຂົ້າໃນວຽກງານຂອງຕຳຫຼວດ ເຊິ່ງບໍ່ພຽງແຕ່ເປັນການນາບຂູ່ຕໍ່ຜູ້ກໍ່ອາຊະຍາກຳເທົ່ານັ້ນ, ຫາກຍັງສາມາດເຮັດໃຫ້ປະຊາຊົນຮູ້ສຶກມີຄວາມປອດໄພກວ່າເກົ່າອີກດ້ວຍ. ຂະນະດຽວກັນ, ເຈົ້າໜ້າທີ່ຕຳຫຼວດມີຄວາມສາມາດເພີ່ມຂຶ້ນຢ່າງຕໍ່ເນື່ອງ, ການເຮັດວຽກກໍຕິດແທດກັບຄວາມຕ້ອງການຂອງປະຊາຊົນຫຼາຍກວ່າເກົ່າ ແລະ ການປະຕິບັດກົດໝາຍຂອງຕຳຫຼວດກໍເປັນລະບຽບແບບແຜນກວ່າເກົ່າ. ທ່ານຫວາງຕ້າເຫວີຍ ກ່າວວ່າ: ຄຽງຄູ່ກັບຄວາມສາມາດຂອງເຈົ້າໜ້າທີ່ ແລະ ອຸປະກອນໄດ້ເພີ່ມຂຶ້ນຢ່າງຕໍ່ເນື່ອງ ໃນຊຸມປີຜ່ານມາ, ຈີນກໍມີທັດສະນະຕໍ່ວຽກງານຕຳຫຼວດແບບປະດິດສ້າງໃໝ່ ແລະຮ່ວມກັບທັດສະນະແຫ່ງການສ້າງກຳລັງຕຳຫຼວດໃຫ້ເຂັ້ມແຂງດ້ວຍວິທະຍາສາດ-ເຕັກນິກ ແລະ ແນວທາງປະຊາຊົນເປັນຕົ້ນ ປະກອບເປັນ "ອາວຸດລັບ" ຂອງຈີນໃນການຮັກສາຄວາມສະຫງົບຮຽບຮ້ອຍໃນສັງຄົມໂດຍລວມ.