ສະຖານທູດຈີນປະຈຳໄທ ໄດ້ຈັດກິດຈະກຳ "ເປີດປະຕູຕ້ອນຮັບປີໃໝ່ປີຈໍ" ຢູ່ໃນສະຖານທູດໃນວັນທີ 10 ກຸມພານີ້ ໂດຍບຸກຄົນຈາກວົງການຕ່າງໆຂອງຈີນແລະໄທ ໄດ້ເຂົ້າຮ່ວມດ້ວຍຄວາມເບີກບານມ່ວນຊື່ນ ເພື່ອສະຫຼອງບຸນກຸດຈີນທີ່ວຽນມາເຖິງ. ກິດຈະກຳເທື່ອນີ້ໄດ້ພາດຫົວຂໍ້ວ່າ "ຈີນ-ໄທເກາະແຂນກັນກ້າວເຂົ້າສູ່ຍຸກໃໝ່, ຮ່ວມກັນສະຫຼອງປີໃໝ່ເໝືອນດັ່ງຄອບຄົວດຽວກັນ" ແລະການເລີ່ມຕົ້ນກິດຈະກຳ ກໍມີນັກຮຽນຈາກໂຮງຮຽນສວນກຸຫຼາບວິທະຍາໄລໄທໄດ້ສະແດງຟ້ອນສິງໂຕທີ່ມີສີສັນພິເສດຂອງຈີນໃຫ້ຜູ້ຮ່ວມກິດຈະກຳໄດ້ຊົມ.
ທ່ານຫຼີຈ້ຽນ ເອກອັກຄະລັດຖະທູດຈີນປະຈຳໄທ ໄດ້ກ່າວປາໄສ ໂດຍສະຫຼຸບທົບທວນໝາກຜົນທີ່ໄດ້ຮັບໃນການໄປມາຫາສູ່ກັນລະຫວ່າງຈີນ-ໄທໃນໜຶ່ງປີຜ່ານມາ ແລະຝາກຄວາມຫວັງຕໍ່ອະນາຄົດ.
ໂອກາດນີ້, ທ່ານ ພອນເພັດ ວິຊິດຊົນໄຊ ປະທານສະພານິຕິບັນຍັດໄທ ໄດ້ກ່າວວ່າ: ມື້ນີ້ ປະຊາຊົນໄທແລະຈີນເຕົ້າໂຮມກັນເພື່ອສະຫຼອງບຸນກຸດຈີນຢ່າງມ່ວນຊື່ນແລະຟົດຟື້ນ ເຊິ່ງສະແດງໃຫ້ເຫັນເຖິງສາຍພົວພັນອັນສະໜິດສະໜົມເໝືອນດັ່ງຄອບຄົວດຽວກັນລະຫວ່າງສອງປະເທດ. ຈາກນັ້ນ, ທ່ານພອນເພັດຍັງໄດ້ສົ່ງຄຳອວຍພອນປີໃໝ່ເຖິງຊາວຈີນແລະຈີນຕ່າງດ້າວຢູ່ແຫ່ງຕ່າງໆໃນໂລກດ້ວຍພາສາຈີນແລະພາສາໄທອີກດ້ວຍ.
