ຕອນຄ່ຳວັນທີ 11 ກຸມພານີ້ຕາມເວລາທ້ອງຖິ່ນ, ຄະນະຜູ້ແທນລະດັບສູງຂອງ ສປປ ເກົາຫຼີ ໄດ້ສິ້ນສຸດການຢ້ຽມຢາມ ສ.ເກົາຫຼີ ແລ້ວກັບຄືນປະເທດດ້ວຍຍົນພິເສດ.
ຄະນະຜູ້ແທນລະດັບສູງຂອງ ສປປ ເກົາຫຼີ ນຳໂດຍທ່ານ ກິມໂຢງນາມ ປະທານຄະນະກຳມະການປະຈຳສະພາປະຊາຊົນສູງສຸດ ສປປ ເກົາຫຼີ. ໄດ້ເດີນທາງໄປຮອດສະໜາມບິນອິນຊອນ ສ.ເກົາຫຼີ ໃນວັນທີ 9 ກຸມພານີ້ດ້ວຍຍົນພິເສດ ເພື່ອເຂົ້າຮ່ວມພິທີໄຂງານໂອລິມປິກລະດູໜາວພຽງຊາງທີ່ຈັດຂຶ້ນໃນຕອນຄ່ຳມື້ດັ່ງກ່າວ. ທ່ານ ມູນແຈອິນ ປະທານາທິບໍດີ ສ.ເກົາຫຼີ ໄດ້ຕ້ອນຮັບການເຂົ້າຢ້ຽມຄຳນັບຂອງຄະນະຜູ້ແທນ ສປປ ເກົາຫຼີ ຢູ່ຊົງວາເດພ້ອມທັງຮ່ວມຮັບປະທານອາຫານທ່ຽງ, ທ່ານ ກິມໂຢຈິງ ໃນຖານະເປັນທູດພິເສດຂອງທ່ານ ກິມເຈິງອູນ ຜູ້ນຳສູງສຸດຂອງ ສປປ ເກົາຫຼີ ໄດ້ຝາກຈົດໝາຍຂອງທ່ານ ກິມເຈິງອູນ ກ່ຽວກັບການປັບປຸງສາຍພົວພັນລະຫວ່າງ ສປປ ເກົາຫຼີ - ສ.ເກົາຫຼີ ໃຫ້ດີຂຶ້ນພ້ອມທັງຄຳເຊື້ອເຊີນໄປຍັງທ່ານ ມູນແຈອິນ ເພື່ອຢ້ຽມຢາມ ສປປ ເກົາຫຼີ. ທ່ານ ມູນແຈອິນ ກ່າວວ່າ, ຫວັງວ່າໃນຕໍ່ໜ້າຈະສາມາດສ້າງເງື່ອນໄຂ, ເພື່ອບັນລຸການຢ້ຽມຢາມ ສປປ ເກົາຫຼີ.