ເວັບໄຊກະຊວງການຄ້າຈີນໃຫ້ຮູ້ວ່າ: ໜັງສືພິມຟີລິບປິນສຕາລາຍງານວ່າ: ຫວ່າງມໍ່ໆມານີ້, ກະຊວງການເງິນຟີລິບປິນໄດ້ອອກຖະແຫຼງການວ່າ ຟີລິບປິນຈະຮ່ວມມືກັບບໍລິສັດອາລີບາບາຂອງຈີນເພື່ອສະໜອງການບໍລິການດ້ານການເງິນເຊັ່ນ: ການໂອນເງິນແລະການຄຸ້ມຄອງຊັບສິນທີ່ສະດວກວ່ອງໄວແລະລາຄາຖືກໃຫ້ແກ່ແຮງງານຟີລິບປິນຢູ່ຕ່າງປະເທດ.
ທ່ານ ຄາລອສ ໂດມິນກຸສ໌ ລັດຖະມົນຕີກະຊວງການເງິນຟີລິບປິນກ່າວວ່າ: ເຕັກນິກການຈ່າຍເຄື່ອນທີ່ຂອງອາລີບາບາມີຕົ້ນທຶນຕ່ຳ,ແລະໄດ້ສະໜອງການບໍລິການດ້ານການເງິນທີ່ລາຄາຖືກໃຫ້ແກ່ວິສາຫະກິດຂະໜາດກາງແລະນ້ອຍຈຳນວນຫຼວງຫຼາຍຂອງຈີນແລ້ວ ເຊິ່ງນີ້ກໍ່ເໝາະສົມທີ່ຈະໃຊ້ກັບແຮງງານຟີລິບປິນຢູ່ຕ່າງປະເທດ.
ກ່ອນໜ້ານີ້, ຟີລິບປິນໄດ້ສ້າງທະນາຄານຊາວຟີລິບປິນຢູ່ຕ່າງປະເທດແຫ່ງໃໝ່ບົນພື້ນຖານທະນາຄານຝາກປະຢັດໄປສະນີຟີລິບປິນເດີມ, ເພື່ອໃຫ້ບໍລິການດ້ານການເງິນແກ່ແຮງງານຟີລິບປິນຢູ່ຕ່າງປະເທດສະເພາະ,ໃນຕໍ່ໜ້າ ທະນາຄານດັ່ງກ່າວອາດຈະນຳເຂົ້າເຕັກນິກການຈ່າຍເຄື່ອນທີ່ຂອງບໍລິສັດອາລີບາບາເພື່ອໃຫ້ບໍລິການແກ່ປະຊາຊົນຟີລິບປິນ.
 |
