ເວັບໄຊທາງການຂອງກະຊວງກໍລະນີສຸກເສີນຣັດເຊຍແຈ້ງຂ່າວໃນວັນທີ 11 ກຸມພານີ້ວ່າ, ຜູ້ໂດຍສານແລະຈຸບິນໃນຍົນໂດຍສານ AN-148 ທີ່ຕົກຢູ່ຊານເມືອງຫ່າງຈາກນະຄອນຫຼວງມົສກູໃນມື້ດຽວກັນ ໄດ້ເສຍຊີວິດທັງໝົດ.
ຂ່າວແຈ້ງວ່າ, ໃນຍົນລຳດັ່ງກ່າວ ມີຈຸບິນ 5 ຄົນ ແລະ ຜູ້ໂດຍສານ 65 ຄົນ, ໃນນັ້ນ ລວມທັງເດັກນ້ອຍ 3 ຄົນ. ປັດຈຸບັນ ໄດ້ພົບກັບດຳຂອງຍົນແລ້ວ, ແຕ່ຂ່າວດັ່ງກ່າວບໍ່ໄດ້ແຈ້ງລະອຽດວ່າ, ກັບດຳນີ້ແມ່ນກັບບັນທຶກສຽງໃນຫ້ອງຂັບ ຫຼື ກັບບັນທຶກຂໍ້ມູນການບິນ.
ເຈົ້າໜ້າທີ່ຄຸ້ມຄອງການບິນພາກພື້ນດິນຣັດເຊຍໃຫ້ຮູ້ວ່າ, ຍົນລຳດັ່ງກ່າວ ໄດ້ບິນຂຶ້ນສູ່ທ້ອງຟ້າໃນເວລາ 14 ໂມງ 21 ນາທີຕາມເວລາ ມົສກູ, ຫຼັງ 14 ໂມງ 26 ນາທີແລ້ວ, ຄວາມໄວການບິນຂອງຍົນດັ່ງກ່າວໄດ້ ຫຼຸດລົງຢ່າງວ່ອງໄວ ແລະໄດ້ຫາຍສາບສູນຈາກໜ້າຈໍຣາດາໃນເວລາ 14 ໂມງ 28 ນາທີ.
ຄະນະກຳມະການສືບສວນສອບສວນສະຫະພັນຣັດເຊຍ ພວມຄົ້ນຫາສາເຫດຂອງຍົນຕົກຄັ້ງນີ້.
 |
