ການເຈລະຈາສັນຍາການພົວພັນຄູ່ຮ່ວມເສດຖະກິດຮອບດ້ານໃນພາກພື້ນ ຫຼື RCEP ຮອບທີ 21 ໄດ້ສຳເລັດລົງຢູ່ອິນໂດເນເຊຍເມື່ອບໍ່ດົນມານີ້ ແລະກະຊວງການຄ້າຈີນໄດ້ຢືນຢັນວ່າ: ບັນດາຝ່າຍໄດ້ປະຕິບັດຕາມຄຳຊີ້ນຳຂອງກອງປະຊຸມຜູ້ນຳ RCEP ຄັ້ງທຳອິດທີ່ຈັດຂຶ້ນເມື່ອເດືອນພະຈິກປີ 2017 ໂດຍສືບຕໍ່ລົງເລິກປຶກສາຫາລືບັນດາຫົວຂໍ້ທີ່ນອນຢູ່ໃນຂົງເຂດຕ່າງໆ ເປັນຕົ້ນ ສິນຄ້າ, ການບໍລິການ, ການລົງທຶນ ພ້ອມກະຕິກາບາງຢ່າງ ແລະໄດ້ຮັບຄວາມຄືບໜ້າເປັນຢ່າງດີ. ຂະນະທີ່ກອງປະຊຸມລະດັບລັດຖະມົນຕີ RCEP ຈະຈັດຂຶ້ນຢູ່ສິງກະໂປໃນວັນທີ 3 ມີນາໜ້ານີ້.
ເນື່ອງຈາກການເຈລະຈາ RCEP ສັບສົນຫຼາຍ ທັງເຕັມໄປດ້ວຍສິ່ງທ້າທາຍຕ່າງໆ, ສະນັ້ນຈຶ່ງບໍ່ສາມາດສຳເລັດການເຈລະຈາໃນປີ 2017 ຕາມຄວາມຫວັງຂອງບັນດາຝ່າຍໄດ້. ປັດຈຸບັນ, ໃນສະພາບທີ່ສັນຍາການພົວພັນຄູ່ຮ່ວມຂ້າມປາຊີຟິກ ຫຼື TPP 11 ສະມາຊິກນອກຈາກອາເມລິກາໄດ້ບັນລຸຂໍ້ຕົກລົງກ່ຽວກັບ TPP ສະບັບໃໝ່ແລ້ວນັ້ນ ການເລັ່ງລັດຊຸກຍູ້ການເຈລະຈາ RCEP ກໍມີຄວາມຈຳເປັນຢ່າງຍິ່ງເຊັ່ນດຽວກັນ.