ຄະນະກຳມະການການບິນລະຫວ່າງປະເທດ ທີ່ມີສຳນັກງານໃຫຍ່ຕັ້ງຢູ່ມົດສ໌ກູ ປະເທດຣັດເຊຍ ໄດ້ຖະແຫຼງໃນວັນທີ 12 ກຸມພານີ້ຕາມເວລາທ້ອງຖິ່ນວ່າ: ກັບດຳ 2 ໜ່ວຍຂອງຍົນອານ-148 ທີ່ຕົກນັ້ນໄດ້ຄົ້ນພົບແລ້ວ ແລະ ນັກວິຊາການກໍເລີ່ມຖອດລະຫັດຈາກສອງກັບດັ່ງກ່າວແລ້ວ.
ວັນທີ 11 ກຸມພານີ້, ຍົນອານ-148 ຂອງຣັດເຊຍລຳໜຶ່ງໄດ້ຕົກຢູ່ຊານເມືອງນະຄອນຫຼວງມົດສ໌ກູ ພາໃຫ້ຜູ້ໂດຍສານແລະຈຸບິນທັງໝົດ 71 ຄົນເສຍຊີວິດ. ຫຼັງເກີດເຫດ, ກະຊວງສະຖານະການສຸກເສີນ, ກອງກຳລັງປ້ອງກັນພົນລະເມືອງ ແລະ ກະຊວງສາທາລະນະສຸກຂອງຣັດເຊຍ ໄດ້ສົ່ງເຈົ້າໜ້າທີ່ແລະອຸປະກອນຈຳນວນຫຼວງຫຼາຍໄປບ່ອນເກີດເຫດ ແລະມາຮອດຕອນທ່ຽງວັນທີ 12 ກຸມພານີ້ ຍັງສືບຕໍ່ຄົ້ນຫາຢູ່. ເນື່ອງຈາກຢູ່ບ່ອນເກີດເຫດມີຫິມະປົກຄຸມ ຈຶ່ງເຮັດໃຫ້ການຊອກຄົ້ນດັ່ງກ່າວມີຄວາມຫຍຸ້ງຍາກ ແລະຄາດວ່າຈະດຳເນີນໄປເປັນເວລາໜຶ່ງອາທິດຈຶ່ງຈະສຳເລັດການຄົ້ນຫາ.