ແຫຼ່ງຂ່າວຈາກດ່ານກວດກາ-ປ້ອງກັນຊາຍແດນຄຸນມິງ ກອງຕຳຫຼວດປ້ອງກັນຊາຍແດນແຂວງຢຸນນານ ໃຫ້ຮູ້ໃນວັນທີ 12 ກຸມພານີ້ວ່າ: ບຸນກຸດຈີນໃກ້ຈະວຽນມາເຖິງແລ້ວ ສະໜາມບິນສາກົນສາງສຸຍ ນະຄອນຄຸນມິງມີຜູ້ໂດຍສານເພີ່ມຂຶ້ນຢ່າງວ່ອງໄວແລະຫຼວງຫຼາຍ ໃນນີ້ມີຜູ້ໄປເຮັດວຽກຢູ່ຕ່າງປະເທດກັບຄືນປະເທດຢ່າງຫຼວງຫຼາຍ ແລະກໍມີນັກທ່ອງທ່ຽວເດີນທາງໄປທ່ຽວຕ່າງປະເທດຢ່າງຫຼວງຫຼາຍເຊັ່ນກັນ ໃນນັ້ນ, ນະຄອນຫຼວງບາງກອກ, ຊຽງລາຍ ແລະ ຊຽງໃໝ່ ປະເທດໄທ, ຫຼວງພະບາງປະເທດລາວ ແລະອື່ນໆຍັງເປັນຈຸດໝາຍປາຍທາງທີ່ໄດ້ຮັບຄວາມນິຍົມກວ່າໝູ່ຢູ່ຄືເກົ່າ ສະນັ້ນ, ໃນໄລຍະບຸນກຸດຈີນປີນີ້, ຍົນໂດຍສານຈາກຄຸນມິງບິນສູ່ປະເທດໄທຈະມີເຖິງ 10 ຖ້ຽວຕໍ່ມື້.
ດ່ານກວດກາ-ປ້ອງກັນຊາຍແດນຄຸນມິງ ຢືນຢັນວ່າ: ແຕ່ວັນທີ 27 ມັງກອນຫາວັນທີ 11 ກຸມພານີ້, ບໍລິສັດການບິນຕ່າງໆໄດ້ເພີ່ມຖ້ຽວບິນສາກົນ 117 ຖ້ຽວ, ແຕ່ລະມື້ມີຖ້ຽວບິນເຂົ້າ-ອອກເມືອງ 100 ຖ້ຽວ. ເພື່ອສ້າງຄວາມສະດວກໃຫ້ແກ່ພີ່ນ້ອງຮ່ວມຊາດທີ່ໄປເຮັດວຽກຢູ່ຕ່າງປະເທດໃນການຜ່ານດ່ານ ແລະສາມາດກັບຄືນບ້ານເກີດໄວຂຶ້ນ, ດ່ານກວດກາ-ປ້ອງກັນຊາຍແດນຄຸນມິງ ໄດ້ເປີດທາງຜ່ານດ່ານສະເພາະຜູ້ກັບຈາກການໄປເຮັດວຽກຢູ່ຕ່າງປະເທດກ່ອນກຳນົດເວລາໃນໄລຍະທີ່ມີຄົນເຂົ້າເມືອງຫຼາຍໃນແຕ່ລະມື້ ເພື່ອອຳນວຍຄວາມສະດວກໃຫ້ແກ່ຜູ້ໄປເຮັດວຽກຢູ່ຕ່າງປະເທດກັບຄືນບ້ານເກີດຂອງຕົນ.