ວັນທີ 13 ກຸມພານີ້, ສຳນັກຂ່າວສູນກາງ ສປປ ເກົາຫຼີລາຍງານວ່າ: ໃນວັນທີ 12 ກຸມພານີ້, ທ່ານກິມເຈິງອູນ ຜູ້ນຳສູງສຸດ ສປປ ເກົາຫຼີໄດ້ຟັງການລາຍງານ ແລະເພິ່ງພໍໃຈຕໍ່ຄະນະຜູ້ແທນລະດັບສູງຂອງປະເທດຕົນທີ່ໄດ້ກັບຄືນຈາກ ສ ເກົາຫຼີ. ທ່ານກ່າວວ່າ: ສ ເກົາຫຼີໃຫ້ຄວາມສຳຄັນສູງຕໍ່ການຢ້ຽມຢາມຂອງຄະນະຜູ້ແທນລະດັບສູງ ແລະຄະນະນັກກິລາຂອງປະເທດຕົນທີ່ໄດ້ເຂົ້າຮ່ວມງານໂອແລມປິກລະດູໜາວພຽງຊາງ ແລະໄດ້ອຳນວຍຄວາມສະດວກສະບາຍທຸກຢ່າງດ້ວຍຄວາມຈິງໃຈ ເຊິ່ງໄດ້ສ້າງຄວາມປະທັບໃຈໃຫ້ແກ່ທ່ານເປັນຢ່າງຍິ່ງ, ດັ່ງນັ້ນທ່ານຈຶ່ງໄດ້ສະແດງຄວາມຂອບອົກຂອບໃຈຕໍ່ເລື່ອງນີ້.
ທ່ານກ່າວຕື່ມວ່າ: ສິ່ງທີ່ສຳຄັນແມ່ນຍົກສູງບັນຍາກາດການທີ່ສອງຝ່າຍມີຄວາມປາຖະໜາຢ່າງແຮງກ້າທີ່ຖືໂອກາດງານກິລາໂອແລມປິກລະດູໜາວຄັ້ງນີ້ ເພື່ອສ້າງຄວາມປອງດອງລະຫວ່າງສອງຝ່າຍ ແລະສືບຕໍ່ໃຫ້ໄດ້ຮັບໝາກຜົນທີ່ດີ. ນອກນີ້, ທ່ານຍັງຊີ້ທິດທາງໃນການປັບປຸງ ແລະເສີມຂະຫຍາຍການພົວພັນລະຫວ່າງສອງປະເທດໃຫ້ດີຂຶ້ນທັງຮຽກຮ້ອງໃຫ້ພາກສ່ວນທີ່ກ່ຽວຂ້ອງປະຕິບັດມາດຕະການຕົວຈິງ.
 |
