ກະຊວງອຸດສາຫະກຳອິນໂດເນເຊຍກຳລັງວາງແຜນພັດທະນາອຸດສາຫະກຳຂອງປະເທດຕົນໃນການຍຸກປະຕິວັດອຸດສາຫະກຳຄັ້ງທີ 4 ຂອງໂລກ, ຜ່ານຈາກການປະຕິວັດເທື່ອນີ້ຈະກາຍເປັນຂອບການພັດທະນາອຸດສາຫະກຳປະເທດຕົນ ເພື່ອສົ່ງເສີມການພັດທະນາເສດຖະກິດໃນອະນາຄົດ.
ຫວ່າງມໍ່ໆນີ້, ທ່ານອາຍລັງກາ ຮາຕາໂຕ ລັດຖະມົນຕີກະຊວງອຸດສາຫະກຳອິນໂດເນເຊຍກ່າວວ່າ: ການປະຕິວັດອຸດສາຫະກຳຄັ້ງທີສີ່ແມ່ນເພື່ອເລັ່ງການຈັດຕັ້ງປະຕິບັດເປົ້າໝາຍການສ້າງເສດຖະກິດຮອດປີ 2045 ຂອງປະເທດຕົນ, ລວມທັງການຫັນເປັນອຸດສາຫະກຳ, ກາຍເປັນປະເທດທີ່ມີລາຍຮັບສູງ, ເສດຖະກິດຂະຫຍາຍຕົວສະເລ່ຍ 6,4% ຕໍ່ປີ, ລາຍຮັບສະເລ່ຍຕໍ່ຫົວຄົນຕໍ່ປີເຖິງ 2,9 ໝື່ນໂດລາສະຫະລັດ ແລະກາຍເປັນປະເທດທີ່ມີລາຍຮັບສະເລ່ຍໃສ່ຫົວຄົນສູງອັນດັບສີ່ຂອງໂລກ. ກະຊວງຕົນໄດ້ກຳນົດເອົາຫ້າຂະແໜງການ ຄື ອາຫານ, ເຄື່ງດື່ມ, ເສື້ອຜ້າອາພອນ, ລົດ ແລະເຄື່ອງອາໄຫຼ່, ຂໍ້ມູນຂ່າວສານເອເລັກໂຕຣນິກ ແລະອຸດສາຫະກຳເຄມີເປັນໂຄງການບຸລິມະສິດໃນການປະຕິວັດພັດທະນາອຸດສາຫະກຳເທື່ອນີ້ ເຊິ່ງຫ້າຂະແໜງການດັ່ງກ່າວມີຄວາມສາມາດແກ່ງແຍ່ງກັບບັນດາປະເທດຕ່າງໆໄດ້.