ວັນທີ 14 ກຸມພານີ້, ທ່ານມາຈ່າວຊຸ້ຍ ຜູ້ແທນຈີນປະຈຳສະຫະປະຊາຊາດໄດ້ກ່າວຄຳປາໄສໃນກອງປະຊຸມເປີດເຜີຍກ່ຽວກັບບັນຫາຊີຣີຂອງສະພາຄວາມໝັ້ນຄົງສະຫະປະຊາຊາດ, ໂດຍໄດ້ບັນຍາຍຫຼັກໝັ້ນຂອງຈີນໃນບັນຫາຊີຣີ.
ທ່ານມາຈ່າວຊຸ້ຍກ່າວວ່າ, ຫວ່າງມໍ່ໆນີ້, ການແກ້ໄຂບັນຫາຊີຣີໂດຍການເມືອງປະກົດມີທ່າອຽງອັນຕັ້ງໜ້າ, ກອງປະຊຸມການສົນທະນາທົ່ວປະເທດຊີຣີທີ່ຈັດຂຶ້ນຢູ່ໂຊຈີ ຣັດເຊຍໄດ້ຮັບຜົນສຳເລັດອັນສຳຄັນ, ໄດ້ເພີ່ມກຳລັງໃຫ້ແກ່ການຈັດການເຈລະຈາສັນຕິພາບເຊີແນວຄືນໃໝ່. ຈີນຊົມເຊີຍຄວາມພະຍາຍາມຂອງປະເທດຕ່າງໆເຊັ່ນຣັດເຊຍເປັນຕົ້ນໃນການຈັດກອງປະຊຸມສົນທະນາໂຊຊີ, ສະໜັບສະໜູນອົງການສະຫະປະຊາຊາດເສີມຂະຫຍາຍບົດບາດທີ່ເປັນຊ່ອງທາງໄກ່ເກຍຕົ້ນຕໍໃນການແກ້ໄຂບັນຫາຊີຣີດ້ວຍການເມືອງ.
ທ່ານກ່າວ່າ, ການແກ້ໄຂດ້ວຍການເມືອງແມ່ນທາງອອກພຽງດຽວຂອງບັນຫາຊີຣີ. ປະຊາຄົມໂລກຄວນຊຸກຍູ້ບັນດາຝ່າຍຂອງຊີຣີລິຟື້ນຟູການເຈລະຈາກັນ ຄືນໃໝ່ໂດຍໄວ, ໂດຍຜ່ານຂະບວນການການເມືອງທີ່ ຂຶ້ນກັບຄົນຊີຣີແລະຖື ຄົນຊີຣີເປັນຕົ້ນຕໍ, ຊອກຫາແຜນການແກ້ໄຂທີ່ສອດຄ່ອງກັບຫຼັກໝັ້ນຂອງບັນດາຝ່າຍຊີຣີ, ທັງຖືກຕ້ອງຕາມຄວາມສົນໃຈຂອງບັນດາຝ່າຍ. ໃນຕະຫຼອດຂະບວນການດັ່ງກ່າວ, ອະທິປະໄຕ, ເອກະລາດ, ຄວາມເປັນເອກະພາບແລະຜືນແຜ່ນດິນອັນຄົບຖ້ວນຂອງຊີຣີຄວນໄດ້ຮັບການເຄົາລົບແລະປົກປັກຮັກສາ.
ທ່ານກ່າວວ່າ, ການຕ້ານການກໍ່ການຮ້າຍແມ່ນດ້ານທີ່ສຳຄັນໃນການແກ້ໄຂບັນຫາຊີຣີ, ປະຊາຄົມໂລກຄວນເພີ່ມທະວີການຮ່ວມມືໃນການຕ້ານການກໍ່ການຮ້າຍ, ຍຶດໝັ້ນມາດຕະຖານເອກະພາບກັນ, ເດັດດ່ຽວໂຈມຕີອົງການກໍ່ການຮ້າຍທີ່ຢູ່ໃນລາຍຊື່ຂອງສະພາຄວາມໝັ້ນຄົງ.
