ວັນທີ 15 ກຸມພານີ້, ກົມສະຖິຕິສະຫະພາບເອີລົບປະກາດຕົວເລກສະແດງໃຫ້ເຫັນວ່າ, ໃນປີ 2017,ສະຫະພາບເອີລົບໄດ້ປຽບດຸນການຄ້າກັບອາເມລິກາ 120 ຕື້ 800 ລ້ານເອີໂຣ, ເພີ່ມຂຶ້ນ 6,8% ເມື່ອທຽບກັບປີ 2016ທີ່ມີຈຳນວນ 113 ຕື້ 100 ລ້ານເອີໂຣ.
ກ່ຽວກັບບັນຫາການຄ້າລະຫວ່າງສະຫະພາບເອີລົບ ກັບ ອາເມລິກາ, ໃນເວລາໃຫ້ສຳພາດຕໍ່ໂທລະພາບເອກະລາດອັງກິດໃນທ້າຍເດືອນມັງກອນແລ້ວນີ້,ທ່ານໂດນາດ ທຼາມ ປະທານາທິບໍດີອາເມລິກາກ່າວວ່າ, ຜະລິດຕະພັນອາເມລິກາເຂົ້າສູ່ຕະຫຼາດສະຫະພາບເອີລົບຍາກຫຼາຍ, ແຕ່ຜະລິດຕະພັນສະຫະພາບເອີລົບພັດຖືກສົ່ງອອກສູ່ອາເມລິກາຢ່າງປອດພາສີ ຫຼື ດ້ວຍພາສີຕ່ຳ, ນີ້ແມ່ນບໍ່ຍຸດຕິທຳ. ທ່ານແຍ້ມໃຫ້ຮູ້ວ່າອາເມລິກາອາດຈະດຳເນີນການແກ້ແຄ້ນທາງການຄ້າຕໍ່ສະຫະພາບເອີລົບ.
ຕໍ່ເລື່ອງນີ້, ໃນທ້າຍເດືອນແລ້ວນີ້, ຄະນະກຳມະການສະຫະພາບເອີລົບຕອບໂຕ້ວ່າ, ຖ້າອາເມລິກາຈຳກັດການນຳເຂົ້າຜະລິດຕະພັນຈາກສະຫະພາບເອີລົບ, ສະຫະພາບເອີລົບກໍ່ຈະໃຊ້ມາດຕະການເພື່ອຕອບໂຕ້ຄືນໃນທັນທີ.
