ວັນທີ 16 ກຸມພານີ້, ຢູ່ອັງກາຣາ ນະຄອນຫຼວງຕວກກີ, ທ່ານເມຟລຸດ ກາວູໂຊກລູ ລັດຖະມົນຕີກະຊວງການຕ່າງປະເທດຕວກກີກ່າວວ່າ, ຕວກກີກັບອາເມລິກາເຫັນດີສ້າງກົນໄກເພື່ອແກ້ໄຂຄວາມຂັດແຍ້ງລະຫວ່າງສອງປະເທດ, ເພື່ອຜ່ອນຄາຍການພົວພັນເຄັ່ງຕຶງລະຫວ່າງສອງຝ່າຍ, ພະຍາຍາມໃຫ້ການພົວພັນຫັນເປັນປົກກະຕິ. ໃນງານຖະແຫຼງຂ່າວທີ່ຮ່ວມຈັດຂຶ້ນກັບທ່ານເຣກສ໌ ຕີເລເຊັນ ລັດຖະມົນຕີກະຊວງການຕ່າງປະເທດອາເມລິກາທີ່ໄປຢ້ຽມຢາມຕວກກີ, ທ່ານກາວູໂຊກລູກ່າວວ່າ, ກົນໄກໃໝ່ນີ້ແມ່ນເພື່ອປະສານງານກັນແກ້ໄຂບັນຫາຕ່າງໆຄືບັນຫາອີຣັກ, ຊີຣີ, ຕ້ານການກໍ່ການຮ້າຍແລະການປົກປັກທາງກົງສຸນເປັນຕົ້ນ.
ທ່ານຕີເລີເຊັນກ່າວວ່າ, ອາເມລິກາຮັບຮອງວ່າຕວກກີມີສິດທີ່ຮັກສາຄວາມປອດໄພຂອງຜືນແຜ່ນດິນແລະເຂດຊາຍແດນຂອງຕົນ, ແຕ່ຕວກກີຄວນຮັກສາການອົດກັ້ນໄວ້ໃນການເຄື່ອນໄຫວທາງການທະຫານທີ່ດຳເນີນຢູ່ອາຟຣິນທີ່ພາກເໜືອຂອງຊີຣີ.