ຕາມຂ່າວ CRI: ກອງປະຊຸມຄວາມໝັ້ນຄົງມິວນິກຄັ້ງທີ 54 ໄດ້ຈັດຂຶ້ນຢູ່ນະຄອນມິວນິກປະເທດເຢຍລະມັນແຕ່ວັນທີ 16 ຫາວັນທີ 18 ກຸມພານີ້, ທ່ານນາງຟູ້ຢິງ ປະທານກຳມາທິການການຕ່າງປະເທດຂອງສະພາປະຊາຊົນແຫ່ງຊາດຈີນໄດ້ຕາງໜ້າຈີນເຂົ້າຮ່ວມກອງປະຊຸມ.
ໃນກອງປະຊຸມຄົບຄະນະເວທີປຶກສາຫາລືທີ່ເນັ້ນຫົວຂໍ້ "ຄວາມໝັ້ນຄົງດ້ານນິວເຄຼຍທີ່ສູນເສຍການຄວບຄຸມ", ທ່ານນາງຟູ້ຢິງໄດ້ກ່າວປາໄສໂດຍຊີ້ໃຫ້ເຫັນວ່າ, ອາວຸດນິວເຄຼຍຍັງແມ່ນອາວຸດທີ່ມີແສນຍານຸພາບລ້າງຜານສູງທີ່ສຸດໃນໂລກປັດຈຸບັນ, ປະເທດຕ່າງໆຄວນໃຊ້ທ່າທີມີຄວາມຮັບຜິດຊອບເພື່ອຊຸກຍູ້ການຄວບຄຸມນິວເຄຼຍຂອງໂລກ.
ທ່ານນາງຟູ້ຢິງກ່າວຕື່ມວ່າ, ຈີນປະຕິບັດນະໂຍບາຍທີ່ບໍ່ໃຊ້ອາວຸດນິວເຄຼຍກ່ອນຜູ້ອື່ນບໍ່ວ່າໃນເວລາໃດແລະໃນສະພາບການໃດໆ, ແລະໃຫ້ຄຳໝັ້ນສັນຍາຢ່າງບໍ່ມີເງື່ອນໄຂທີ່ບໍ່ໃຊ້ອາວຸດນິວເຄຼຍຫຼືຂົ່ມຂູ່ການໃຊ້ອາວຸດນິວເຄຼຍຕໍ່ປະເທດແລະເຂດແຄວ້ນທີ່ບໍ່ມີອາວຸດນິວເຄຼຍ. ນອກນີ້ຈີນມີຈຸດຢືນທີ່ຫ້າມໃຊ້ແລະທຳລາຍອາວຸດນິວເຄຼຍຢ່າງເຖິງຖອງແລະຮອບດ້ານມາໂດຍຕະຫຼອດ.
 |
