ຕາມຂ່າວCRI: ເວລາ 14 ໂມງຂອງວັນທີ 18 ກຸມພານີ້, ປະຊາຊົນຊົນເຜົ່າສ່ວນໜ້ອຍຈາກຕາແສງຕ່າງໆ ເມືອງປົກຄອງຕົນເອງເຜົ່າໄທລື້ເຜົ່າລ່າຮູ້ແລະເຜົ່າຫວາເມີ້ງລຽນທີ່ຂຶ້ນກັບເມືອງພູເອີ ແຂວງຢູນນານໄດ້ເຕົ້າໂຮມກັນຢູ່ເດີ່ນໃຫຍ່ອົງການປົກຄອງເມືອງ, ເພື່ອເຂົ້າຮ່ວມກິດຈະກຳອວຍພອນບຸນກຸດຈີນ ພ້ອມກັນສະຫຼອງປີໃໝ່.
ຜູ້ຕາງໜ້າຊົນເຜົ່າສ່ວນໜ້ອຍຕ່າງໆໄດ້ມອບຂອງຂວັນຂອງຕົນ ເຊັ່ນ, ເຫຼົ້າເຂົ້າທີ່ກັ່ນຜະລິດເອງ, ສັດລ້ຽງທີ່ລ້ຽງເອງ ແລະ ໝາກໄມ້ທີ່ປູກເອງໃຫ້ແກ່ບັນດາຜູ້ນຳເມືອງເມີ້ງລຽນ, ຜູ້ນຳເມືອງຕ່າງກໍ່ມອບຂອງຂວັນຂອງຕົນຄືນຕາມລຳດັບ ທັງມອບອັ້ງເປົາໃຫ້ແກ່ປະຊາຊົນຊົນເຜົ່າຕ່າງໆ.
ຫຼັງຈາກນັ້ນ, ປະຊາຊົນຊົນເຜົ່າຕ່າງໆ ເຊັ່ນ,ເຜົ່າໄທລື້, ເຜົ່າລ່າຮູ້, ເຜົ່າຫວາ, ເຜົ່າຮານີ ແລະ ເຜົ່າຈີງໂພ່ ໄດ້ຮ່ວມກັນເສບດົນຕີພື້ນເມືອງ, ຟ້ອນລຳທຳເພງ ເພື່ອສະແດງຄວາມຂອບໃຈຕໍ່ພັກ ແລະ ລັດ.
ກິດຈະກຳສະຫຼອງປີໃໝ່ໄດ້ດຳເນີນຈົນຮອດ 16 ໂມງໂດຍມີປະຊາຊົນຫຼາຍຮ້ອຍຄົນເຂົ້າຮ່ວມ.