ເມື່ອປີ 1905, ທາງລົດໄຟປັກກິ່ງ-ຈ່ຽງເຈຍໂຂ ເຊິ່ງເປັນທາງລົດໄຟສາຍທຳອິດທີ່ຄົນຈີນອອກແບບກໍ່ສ້າງເອງໄດ້ເລິ່ມກໍ່ສ້າງຢ່າງເປັນທາງການ. ມາຮອດປັດຈຸບັນ,ຮ້ອຍກວ່າປີໄດ້ຜ່ານໄປ ແລະ ທາງລົດໄຟຄວາມໄວສູງປັກກິ່ງ-ຈ່ຽງເຈຍໂຂ ທາງລົດໄຟປັກກິ່ງ-ຈ່ຽງເຈຍໂຂສາຍໃໝ່ທີ່ຫາບແບກພາລະກຳທີ່ປະຫວັດສາດໃໝ່ນັ້ນກຳລັງກໍ່ສ້າງຢູ່. ທາງລົດໄຟຄວາມໄວສູງສາຍນີ້ບໍ່ພຽງແຕ່ຈະຮັບປະກັນການຄົມມະນາຄົມໃນໄລຍະຈັດງານກິລາໂອລິມປິກລະດູໜາວປັກກິ່ງປີ 2022 ເທົ່ານັ້ນ, ຍັງຈະເຮັດໃຫ້ທາງລົດໄຟຄວາມໄວສູງຂອງຈີນເຂົ້າສູ່ຍຸກ 2,0 ອີກດ້ວຍ
ທາງລົດໄຟຄາວມໄວສູງປັກກິ່ງ-ຈ່ຽງເຈຍໂຂແມ່ນພາກສ່ວນສຳຄັນຂອງຕອນຕາເວັນອອກຂອງທາງລົດໄຟປັກກິ່ງ-ລານໂຈ່ວທີ່ນອນຢູ່ໃນເຄືອຂ່າຍທາງລົດໄຟ "8ສາຍຕັ້ງ8ສາຍຂວາງ"ຕາມແຜນການຂອງຈີນ. ທາງລົດໄຟຄວາມໄວສູງສາຍນີ້ທິດຕາເວັນອອກເລິ່ມແຕ່ສະຖານີລົດໄຟເໜືອປັກກິ່ງ, ທິດຕາເວັນຕົກໄປຮອດເມືອງຈ່ຽງເຈຍໂຂແຂວງເຮີເປີຍ, ຍາວປະມານ 173 ກິໂລແມັດ. ຫຼັງຈາກເປີດບໍລິການແລ້ວ, ການຂີ່ລົດໄຟຈາກປັກກິ່ງຮອດຈ່ຽງເຈຍໄຂຈະໃຊ້ເວລາຫຼຸດ ຈາກ 3 ຊົ່ວໂມງປາຍໃນປັດຈຸບັນລົງເປັນ 50 ນາທີ.
ທ່ານຫຼີເຢ້ນໂປ໋ ຮອງຫົວໜ້າພະແນກໂຄງການຂອງບໍລິສັດທາງລົດໄຟຈິ່ງຈ່າງ ເຊິ່ງເປັນຜູ້ກໍ່ສ້າງທາງລົດໄຟຄວາມໄວສູງປັກກິ່ງ-ຈ່ຽງເຈຍໂຂໄດ້ໃຫ້ສຳພາດຕໍ່ນັກຂ່າວວ່າ, ທາງລົດໄຟຄວາມໄວສູງປັກກິ່ງ-ຈ່ຽງເຈຍໂຂເລິ່ມກໍ່ສ້າງໃນ 6 ເດືອນຕົ້ນປີ 2016, ຈະສ້າງສຳເລັດພ້ອມກັບທາງລົດໄພສາຂາຊົງຫຼີໃນປີ 2019. ເມື່ອທຽບກັບທາງລົດໄຟປັກກິ່ງ-ຈ່ຽງເຈຍໂຂສາຍເກົ່າ, ໃນການກໍ່ສ້າງທາງລົດໄຟຄວາມໄວສູງປັກກິ່ງ-ຈ່ຽງເຈຍໂຂ ບໍ່ວ່າດ້ານກຳມະວິທີ ຫຼື ເຄື່ອງອຸປະກອນຕ່າງໆທີ່ໃຊ້ໃນການກໍ່ສ້າງກໍ່ກ້າວໜ້າຫຼາຍ, ທາງລົດໄຟຄວາມໄວສູງສາຍນີ້ຈະກໍ່ສ້າງໃຫ້ ເປັນໂຄງການທີ່ເປັນຂີດໝາຍສຳຄັນຂອງທາງລົດໄຟຈີນ.