ວັນທີ 20 ກຸມພານີ້, APPຢ່າງໜຶ່ງເອີ້ນວ່າ "DU30" ໄດ້ເລີ່ມນຳໃຊ້ຢ່າງເປັນທາງການໃນປະເທດຟິລິບປິນ ເຊິ່ງເປັນຊ່ອງທາງການແລກປ່ຽນໂດຍກົງລະຫວ່າງທ່ານໂຣດຣີໂກ ດູເຕີເຕ ປະທານາທິບໍດີຟິລິບປິນ ແລະປະຊາຊົນ. ທ່ານພາວໂລ ໄຊຄອນ CEOບໍລິສັດຄົ້ນຄວ້າ ແລະພັດທະນາຊອບແວIbayadກ່າວວ່າ: ການຄົ້ນຄວ້າຜະລິດຊອບແວດັ່ງກ່າວກໍເພື່ອສ້າງຄວາມສະດວກໃຫ້ແກ່ການແລກປ່ຽນລະຫວ່າງປະທານາທິບໍດີ ແລະປະຊາຊົນຟິລິບປິນ ແລະເຜິຍແຜ່, ແບ່ງປັນຂໍ້ມູນຂ່າວສານໃຫ້ສະດວກຍິ່ງຂຶ້ນ.
APP "DU30" ແມ່ນຄົ້ນຄວ້າ ແລະພັດທະນາໂດຍບໍລິສັດIbayad ໂດຍໄດ້ຮັບການມອບສິດຈາກຫ້ອງການຖະແຫຼງຂ່າວທຳນຽບປະທານາທິບໍດີຟິລິບປິນ ເຊິ່ງສາມາດນຳໃຊ້ໃນລະບົບມືຖືApple ແລະAndroid. ຜູ້ໃຊ້ຊອບແວດັ່ງກ່າວສາມາດຮັບຮູ້ກິດຈະກຳຕ່າງໆ ແລະຂໍ້ມູນຂ່າວສານກ່ຽວກັບປະທານາທິບໍດີ, ນອກຈາກນີ້ຍັງສາມາດສົ່ງຂໍ້ຄວາມໄວ້ໃຫ້ປະທານາທິບໍດີ ເພື່ອປະກອບຄວາມເຫັນ, ຮັບຟັງ ຫຼື ເບິ່ງລາຍການສື່ມວນຊົນທາງການຟິລິບປິນ, ໂທສາຍດ່ວນ 8888 ຫຼື 911 ເພື່ອຂໍຄວາມຊ່ວຍເຫຼືອນຳປະທານາທິບໍດີຟິລິບປິນ.