ຕາມຂ່າວCRI:ກິດຈະກຳເຜີຍແຜ່ວັດທະນະທຳມວຍໄທເກັກ "ໜຶ່ງແລວທາງໜຶ່ງເສັ້ນທາງ"ໄດ້ຈັດຂຶ້ນຢູ່ເຢຍລະມັນແຕ່ວັນທີ 19 ຫາວັນທີ 20 ກຸມພາຕາມເວລາທ້ອງຖິ່ນ ໂດຍໄດ້ເຊື້ອເຊີນຜູ້ສືບທອດທີ່ເປັນຕົວແທນໃນໂຄງການໄທເກັກ ເຊິ່ງເປັນມໍລະດົກທາງດ້ານວັດທະນະທຳທີ່ບໍ່ແມ່ນວັດຖຸລະດັບຊາດຈີນເດີນທາງໄປປະເທດທີ່ຢູ່ລຽບຕາມ"ໜຶ່ງແລວທາງໜຶ່ງເສັ້ນທາງ" ເພື່ອໂຄສະນາ ແລະ ຖ່າຍທອດວັດທະນະທຳໄທເກັກ ແລະ ໄດ້ຮັບການສະໜັບສະໜູນຈາກສະຖານທູດຈີນປະຈຳຕ່າງປະເທດ.
ກິດຈະກຳດັ່ງກ່າວໄດ້ຈັດຂຶ້ນຢູ່ສູນວັດທະນະທຳຈີນແບັກແລັງ, ອາຈານມວຍໄທເກັກ 6 ທ່ານໄດ້ສະແດງ ແລະ ອະທິບາຍສິດສອນມວຍ ແລະ ທັດສະນະຄະຕິໄທເກັກເປັນເວລາ 2 ມື້. ປະຊາຊົນທ້ອງຖິ່ນກໍສະໝັກຊື່ເຂົ້າຮ່ວມຢ່າງຫຼວງຫຼາຍແບບບໍ່ເຄີຍມີມາກ່ອນ.
ຂ່າວແຈ້ງຕື່ມວ່າ, ກິດຈະກຳເຜີຍແຜ່ວັດທະນະທຳໄທເກັກຈີນ "ໜຶ່ງແລວທາງໜຶ່ງເສັ້ນທາງ" ຢູ່ເອີລົບເທື່ອນີ້ນັບແຕ່ວັນທີ 18 ກຸມພາຈົນຮອດວັນທີ 1 ມີນາໜ້ານີ້ ໂດຍຈະສັນຈອນຈັດຂຶ້ນຢູ່ນະຄອນຫຼວງແບັກແລັງປະເທດເຢຍລະມັນ, ເມືອງເວນິສປະເທດອີຕາລີ,ນະຄອນຫຼວງວຽນປະເທດໂອດຣິສ ແລະ ນະຄອນຫຼວງບູດາແປັດສ໌ປະເທດຮົງກາລີຕາມລຳດັບ.