ຕອນບ່າຍວັນທີ 21 ກຸມພານີ້ຢູ່ເມືອງລາຊີໂອ ພາກເໜືອລັດສານປະເທດມຽນມາໄດ້ເກີດເຫດລະເບີດສົ່ງຜົນເຮັດໃຫ້ມີຜູ້ເສຍຊີວິດ 2 ຄົນແລະບາດເຈັບ11 ຄົນ, ອາຄານຫຼາຍຫຼັງໄດ້ຮັບຜົນເສຍຫາຍ.
ເຈົ້າໜ້າທີ່ຕຳຫຼວດເມືອງລາຊີໂອຢືນຢັນວ່າ ເວລາປະມານ 16 ໂມງ 30 ນາທີຂອງວັນທີ 21 ກຸມພານີ້, ຢູ່ລະຫວ່າງທະນາຄານໂຢມາກັບທະນາຄານອາຢາຂອງເຂດທີສອງເມືອງຕົນໄດ້ເກີດເຫດລະເບີດ ເຮັດໃຫ້ອາຄານຂອງທະນາຄານສອງແຫ່ງດັ່ງກ່າວໄດ້ຮັບຜົນເສຍຫາຍ. ຕຶກຫ້ອງການຂອງພະແນກສາທາລະນະສຸກທີ່ຢູ່ເຊິ່ງໜ້າກັບທະນາຄານພ້ອມດ້ວຍລົດຈຳນວນໜຶ່ງທີ່ຢູ່ບໍລິເວນໃກ້ຄຽງກໍໄດ້ຮັບຜົນເສຍຫາຍເຊັ່ນກັນແລະມີແມ່ຍິງສອງຄົນເສຍຊີວິດຫຼັງຖືກສົ່ງໄປໂຮງໝໍແຕ່ບໍ່ສາມາດຊ່ວຍເຫຼືອຊີວິດໄວ້ໄດ້, ແລະຜູ້ບາດເຈັບອື່ນໆກຳລັງນອນປິ່ນປົວຢູ່ໂຮງໝໍປະຊາຊົນລາຊີໂອ.
ສື່ມ່ວນຊົນບາງສຳນັກຂອງມຽນມາລາຍງານວ່າ: ລະເບີດທີ່ຜູ້ກໍ່ເຫດໃຊ້ໃນເຫດການຄັ້ງນີ້ແມ່ນລະເບີດເວລາ. ຫຼັງເກີດເຫດລະເບີດ,ເຈົ້າໜ້າທີ່ກູ້ໄພກໍໄດ້ປະຕິບັດໜ້າທີ່ຢ່າງຮີບດ່ວນ, ແລະເຈົ້າໜ້າທີ່ຕຳຫຼວດກໍກຳລັງກວດກາເພື່ອຢືນຢັນວ່າຍັງມີລະເບີດອື່ນໆອີກຫຼືບໍ່.