ສຳນັກຂ່າວຣັດເຊຍວັນນີ້ໄດ້ອ້າງຕາມການເປີດເຜີຍຂອງສູນໄກ່ເກ່ຍການຢຸດຍິງຣັດເຊຍປະຈຳຊີຣີໂດຍລາຍງານວ່າ: ວັນທີ 20 ກຸມພານີ້, ສູນໄກ່ເກ່ຍການຢຸດຍິງຣັດເຊຍປະຈຳຊີຣີທີ່ຕັ້ງຢູ່ນະຄອນຫຼວງດາມາດຊີຣີໄດ້ຖືກໂຈມຕີ ແຕ່ບໍ່ມີຄົນຣັດເຊຍເສຍຊີວິດ ຫຼື ບາດເຈັບ.
ການໂຈມຕີດັ່ງກ່າວໄດ້ເຮັດໃຫ້ສູນໄກ່ເກ່ຍຖືກເສຍຫາຍຢ່າງໜັກໜ່ວງ. ຂະນະດຽວກັນຜູ້ປະກອບອາວຸດຍັງຍິງປືນໃຫຍ່ໃສ່ເຮືອນປະຊາຊົນທີ່ຢູ່ໃກ້ກັບສູນດັ່ງກ່າວ ສົ່ງຜົນເຮັດໃຫ້ມີປະຊາຊົນຊີຣີເສຍຊີວິດ ແລະບາດເຈັບຈຳນວນໜຶ່ງ.
ຂ່າວແຈ້ງຕື່ມວ່າ: ສູນໄກ່ເກ່ຍການຢຸດຍິງຣັດເຊຍປະຈຳຊີຣີໄດ້ຊາບວ່າ ຢູ່ແຂວງອາເລບໂປ, ລະຕາເກຍ, ອິດລິບ ແລະໂຮມສໄດ້ລະເມີດສັນຍາຢຸດຍິງ. ສະນັ້ນ, ສູນດັ່ງກ່າວຈຶ່ງໄດ້ຮຽກຮ້ອງໃຫ້ຝ່າຍໆທີ່ກ່ຽວຂ້ອງປະຕິບັດຕາມສັນຍາຢຸດຍິງຢ່າງເຂັ້ມງວດ.
 |
